MANGTHA LE, Dr Lip

(Dr Hranghrima a chawl ta)

📒Remmuana Chawngthu🖊️

Ka diary ka keu let a, Ni 3 Sept 2010 -ah khatih laia A&C Auditorium (Venglai, Lunglei)-ah *MEET THE AUTHORS* programme buatsaih a ni, khami ṭum khan ka tel ve a, hun nuam tak kan hmang. Lungleia thu leh hlaa kan chhuanvawr mi palite - _F.Laltuaia, K.Biaksanga, Lalthangliana Hnamte (Rev), Dr Hranghrima_ te kawmna hun hman a ni. Kha kha a (Dr Lip) hmel ka hmuh hmasak berna a nih bakah, a chanchin ka hriat chian leh zualna a ni.

A ṭawng duh si a, fiamthu a thiam bawk si, a bula awm a nuam takzet a ni.

Miten an sawi fona tur chu, Makedonia chanchinbu chhiar tinuamtu a ni a, a hming lemah "Dr Lip" tih pu ngat a ni. *Pathian thu khirhkhan tak tak leh thu tluang pangngai hmanga Pathianni tin, mi sang tam tak hnena Pathian thu lo hrilh tawhtu a ni.* A va ropui em!

Mahni buai buaia ka buai avangin ka hmuh lohna chin a rei tawh hle. Kei tehlul min hre ve a, min kawm ve duh ṭhin a, ka va han lawm chiang tak. 

*Dhubi mual B.A.-ah mah private lehnghal a ni nain, 'sap tawng a thunun thei' tih mai tur khawpin sap ṭawng a thiam a; thil ti mai mai lo, pa kawm nuam leh thothang ṭha, thluak fim leh a ngaihna hria tih hi ka hmuh ve dan a ni ber e.* Ka hriat dan chuan *"Dr Lip"* tih hming a put hi, tute tan pawh lam leh hriat a awlsam vanga pu ta, kawh leh hawi zawng em em nei lem lo a ni.

Ama'n a tia lawm, matric 1st div.-a a pass ṭum hian, _"Ka pianthar hma, ka zu in vanglai a ni a, exam lai pawhin zan lamah zu ka in a, a tukah a ṭhing rim nam rum rumin ka exam a. Rilru lo nei deuh ik ila, ka thleng sang deuh tur"_ a ti. Heti chunga hetiang a ni thei hi pui tak a ni. 

Scientist ropui Albert Einstein anga inchei mawl mang thei tak, lukhum hmathlawk, t-shirt leh jacket hmanga a hun tam zawk inbel ṭhin a ni a, necktie leh kawrchung a inbel ngai meuh lo niin ka hria. Ka hriat leh dan phei chuan, Mizoram pel hian a la chhuak ngai meuh lo niawm a ni. *Mawl mang thei ang berin inchei mahsela, a thluak leh a ngaihtuahna hi chu a mawl mang lo chiang kher mai.*

A sakhming dai tawh lo tur hi, zirna kawnga a sulhnute, vantlang tana a hnathawhte, thu leh hlaa a kuthnu zawng zawngte sawi turin ka hriatna a zau tawk lo a, sawi kim loh palh ka hlau. *Finna zempui, hriatna kailawn, purchawkna duhawm,* tiin amah hi khaikhawm mai teh ang aw. _Finna, hriatna leh rinna kawnga Zofate kai ṭhintu, he mi ropui thlahna thu ziak theia ka awm hi ka lawm takzet a ni._

_A kalsan tak, a chhungte chungah Lalpa hnen ata thlamuanna lo awm mawlh rawh se._

Mangṭha le, ka pu...