I NGAIHTUAHNATE HIAN I NUN A THUNUN ṬHIN

-Rick Warren 

-11 Jan, 2022

“I thil ngaihtuahah fimkhur rawh; I nun hi i ngaihtuahnate aṭanga lo chhuak a ni si a." Thufingte 4:23 (GNT)

I thil hmachhawn mek thlak danglam ai chuan i rilru thlak danglam hi Pathian duh dan a ni zawk.

Mi tam zawk chuan Pathianin an harsatna zawng zawngte la kiang se an duh: heng natna, lungngaihna, tawrhna, damlohna, leh vanduaina te pawh hi. Mahse Pathian chuan nangmaha hnathawh hmasak a duh a ni, a chhan chu i ngaihtuahna i thlak hma loh chuan i danglam dawn lo - i rilru i siamthar hma chu i nunah danglamna a thleng lo ang.

Rilru lam inbuatsaihna chu engvangin nge a pawimawh viau? Heng te hi a chhan kawng thumte an ni:

I ngaihtuahnaten i nun an thunun avangin.

Thufingte 4:23 ah chuan, “I thil ngaihtuahah fimkhur rawh; I nun hi i ngaihtuahnate aṭanga lo chhuak a ni si a" tih kan hmu. I ngaihtuahna chuan nasa takin a ṭha lamah emaw a chhe lamah emaw i nun kaihhruai theihna a nei a ni. Entirna atan, ṭhang mek i nih lai khan : “Engahmah i laktlak loh. I pawimawh hlawl lo" ti ta che sela. Chu chu thudik lo nimahse, i pawm hmiah a ni. Kum engemaw ral hnuah chuan, chu chuan i nun a hruai tlat a ni. Chuvang chuan eng ngaihtuahna nge i nun nghawng tura i sengluh phal tih a pawimawh ta a ni.

Rilru hi sual tan indona tualzawl a nih avangin.

Thlemna zawng zawng hi rilru thil thleng vek a ni. Paulan Rom 7:22-23 ah, “Ka rilru tak takin Pathian dan chungah ka lawm si thin a; nimahsela ka taksa pengahte hian dan danglam a awm tih ka hria, chu chuan ka rilru dan a do va, ka taksa pengtea sualna dan awm hnenah chuan salah mi hruai ṭhin a" a ti a ni.

I rilru a lo chauh ṭhinna chhan pakhat chu i thluakah ni khatah darkar 24 chhung indona a thlen ṭhin vang a ni. Nasa taka inbeihna a awm avangin a ti derthawng a, a nasat ṭhin nachhan chu i rilru hi i thil neih ropui ber a nih vang a ni. I thil neih ropui ber chu Setanan a duh a ni!

Muanna leh hlimna thlentu a nih avangin. Rilru buatsaihlohna chuan chiaina a thlen fo. Rilru buatsaih diamna chuan hahdamna a thlena. Rilru inbuatsaih lohna chuan buaina a thlen ṭhin. Rilru inbuatsaih chuan inrintawkna min pe a. I rilruin a hruaina che i thunun loh chuan, i nunah rilru hahna tam tak i hmachhawn ang. Mahse rilru buatsaih lawkna chuan chakna, himna leh hahdamna a thlen ṭhin. 

Bible chuan “Tisa lam thilte duh chu thihna a ni si a, Thlarau lam thil duh erawh chu 'nunna leh thlamuanna a ni” a ti. Rom 8:6

Ngaihtuah zui atan

Pathian lawm zawng eng rilru nge i put ṭhin? Pathian duh loh zawng eng rilru nge i put ṭhin le?

Rilru lam inbuatsaih dan engtin nge i zir ang?

Rilru lam inbuatsaih thei turin Pathian Thuin engnge min zirtir?

Pathian Chhandamna thutiam hi i ring em?

I ring a nih chuan, hetiang hian ṭawngṭai rawh le:

“Duhtak Isu, ka sualna avanga nang nena kan inṭhenhrana hi ka duh tawh lo. Nang ka rin che chuan ka thiltih sual zawng zawngte min ngaidam dawn a ni tih min tiam angin, nun awmzia hi zir ka tum ta, chutichuan i vanram in nuamah engtikniah emaw chuan min la pawm ve ang. 

“Ka sualnate ka rawn puanga, ka chhandamtu i ni tih ka ring e. Ka sualnate ka puana nang ka rin che chuan ka him ang tih min tiama. Chhandamna chu khawngaihna avangin rinna kaltlanga kan neih a ni a thildang vang a ni lo i tih avangin ka ring che a ni. Ka nunah hian Lal ni turin ka pawm ta che. Vawiinah hian i hnung zui ka duh a, ti tura min tih apiang chu ti turin ka inpeih e.

“Nung tura min siam ang ngeia nun ka duha. Hlimna dik chhar ka duha, mahnia tana nuna ai chuan damchhunga i rawngbawl ka duh a ni. Ka nunna i hnenah ka hlana, min chhandam tur leh i angchhunga min pawm ve turin ka ngen a che. Isua hmingin ka dil e. Amen.”    

Isua pawm tura i ṭawngṭai thei a nih chuan, he email ah hian min lo hriattir la, min lo bia ang che Rick@PastorRick.com. Isua nena zinkawng i zawh ṭanna tura thil pawimawn a thlawnin ka pe dawn che nia.  

[Lettu: Sangpuia]