Skill India intihsiak-ah Mizoram Nula-in Gold la

Aizawl | January 11, 2021: Delhi khawpuia Skill India intihsiakna neih mekah Mizoram team zinga mi Lalbiakdiki chuan gold a la.

Vanlalbiakdiki hian Shoe Making Category ah gold lain, hriat theih chinah Mizoram aṭanga   kal zinga pakhatna dinhmun luah awm chhun a la ni.

Vanlalbiakdiki hi Sihmui khua niin, Lalzuiliana leh Lalchharliani te fanu a ni.

Labour, Employment, Skill Development and Entrepreneurship Department hmalaknain Mizoram Team member 12-te chu trade 9-a India Skills National Competition, New Delhi-a neih intihsiakna hmachhawn turin Pu Lalramsanga Sailo, Secretary, LESDE Dept. chuan Jan 4 khan a lo vailiam tawh a ni.

Indiaskills 2021, National Competition-ah hian Regional level Competition - zone hrang hrang pali (North, South, East leh West Zone) atanga Gold leh Silver medal dawngtute an intihsiak dawn a. Thalai 2.5 lakhs chuang tel tura in-register zingah, Regional Level competition-ah hian mi 500 chuang an tling a, heng tlingte hi National level-ah hian an inel leh a, trade hrang hrang 54 hmangin an intihsiak. Mizo thalai telte hi Bakery, Carpentry, Fashion Technology, Floristry, Hairdressing, Hotel Reception, Painting & Decoration, Plumbing & Heating leh Welding trade hmanga intihsiaknaah an tel a. He intihsiakna paltlangte hian World skills 2022, Shanghai, China-a neih turah India aiawhin intihsiakna an hmachhawn leh ang.

Mizoram Team-te hi LESDE Director leh Officials pali ten an tawiawm a. Intihsiakna hi January 6 khan ṭan niin, January 20, 2022 thleng awh tur niin, Pragati Maidan, New Delhi ah nghah a ni.