Ticker

10/recent/ticker-posts

I NGAIHTUAHNA CHU PATHIAN THUIN CHAWM RAWH

- Rick Warren 

-12 January, 2022



"Mihring hi chhang chauhvin an nung lo vang a, Pathian kaa thu tin chhuakin an nung zawk ang" (Matthaia 4:4)

Rilru hrisel tak neih i duh chuan, i ngaihtuahna chu thudika i chawm a ngai a ni.

Chaw ṭha pawimawhna i hria a. Chaw ṭha leh chakna pai tam chuan a tichak ang che a, thahrui leh hriselna ṭha zawk a pe ang che. Chaw chakna awm lo chuan i taksa a ti khawlo mai a ni. Chutiang chiah chu i rilru ngaihtuahna pawh a ni. I ngaihtuahna chu tûr emaw chaw dangral mai mai ni loin thudikin chawm ṭhin rawh.

Ṭum khat chu Oxford University ah zirtirna hun ka nei hlauh mai a. Chuta ka awm lai chuan Oxford Analytica an tih mai inhmuhkhawmnaah tel tura sawm ka ni — heng mi intelkhawm te hian khawvel huap ang pawhin an tla na hle a ni. Tuktin zing dar 6 ah khawvel hmun hrang hrang aṭanga mithiam rualte chu kal khawmin darkar 24 liamtaa thil thleng te, China rama thlai man sang chho zel leh Middle East lama buaina reh thei lo thlengin an sawiho ṭhin a. Chumi hnuah chuan thutlukna an siam ta ṭhin a ni. Dar 11 ah chuan thutlukna an siam chu sum tak tak sengin sawrkar leh pawl lian tak tak ten chu thurawn chu an la ṭhin a ni.

Oxford Analytica din a nihna chhan chu hruaitu ṭha berte chuan thurawn ṭha ber an dawn chuan thutlukna ṭha ber an siam thei ang tih ngaihtuahna aṭanga lo lut a ni. A chhan chu hruaitu ṭha pawhin thurawn lakna ṭha an neih loh chuan thutlukna an siam sual theih vang a ni.

Pathian duh dan anga - nundan ṭha bera nung turin thurawn lakna ṭha ber i neih ve tho a ngai a ni. Chu thurawn lakna chu Pathian Thu ah i hmu ang.

Bible chuan, "Mihring hi chhang chauhvin an nung lo vang a, Pathian kaa thu tin chhuakin an nung zawk ang" Matthaia 4:4 a ti a ni.

Pathian chuan thutlukna ṭha ber i siam theihna turin thurawn ṭha ber a hnen aṭanga dawng turin a duh che a ni. Chu chu Pathian Thu a nileng leh nitina inchawmin i ti thei a ni.

Ngaihtuah zui atan

* Zing hun i hmanah engnge pawimawh ber? Pathian Thu i zirna hun atan eng hun nge i ruat?

* I hnathawhnaah engtin nge Pathian Thu zirna leh  vawnna hun i siam theih ang?

* I chhungkua emaw ṭhiante emaw Pathian Thua chawmna kawng remchang engte nge ni?

Pathian thutiam chhandamna hi i ring ve tawh em?

Isua hnenah i nun i hlan duh chuan, hetiang hian ṭawngṭai rawh le:

“Duhtak Isu, ka sualna avanga nang nena kan inṭhenhranna hi ka duh tawh lo. Nang ka rin che chuan ka thiltih sual zawng zawngte min ngaidam dawn a ni tih min tiam angin, nun awmzia hi zir ka tum ta, chutichuan i vanram in nuamah engtikniah emaw chuan min la pawm ve ang. 

“Ka sualnate ka rawn puanga, ka chhandamtu i ni tih ka ring e. Ka sualnate ka puana nang ka rin che chuan ka him ang tih min tiama. Chhandamna chu khawngaihna avangin rinna kaltlanga kan neih a ni a thildang vang a niilo i tih avangin ka ring che a ni. Ka nunah hian Lal ni turin ka pawm ta che a. Vawiinah hian i hnung zui ka duh a, ti tura min tih apiang chu ti turin ka inpeih e.

“Nung tura min siam ang ngeia nun ka duha. Hlimna dik chhar ka duha, mahni tana nuna ai chuan damchhunga i rawngbawl ka duh a ni. Ka nunna i hnenah ka hlana, min chhandam tur leh i angchhunga min pawm ve turin ka ngen a che. Isua hmingin ka dil e. Amen.”    

Isua pawm tura i ṭawngṭai thei a nih chuan, he email ah hian min lo hriattir la, min lo bia ang che Rick@PastorRick.com. Isua nena zinkawng i zawh ṭanna tura thil pawimawh a thlawnin ka pe dawn che nia.  

[Lettu: Sangpuia]

Post i hmuh dan

Post a Comment

0 Comments