Rengdil khaw kum 100na lawm

Aizawl | January 11, 2021: Rengdil khua chuan vawiin khan an khaw kum 100 an lawm a, zanin khan vantlang inkhawma hun hmangin Hachhek bialtu MLA Lalrindika Ralte chuan khualzahawm niin hun a hmanpui a, Centenary lawmna inkhawm a hawng.


Hachhek bialtu MLA hian kum upate tan thilpek a hlan a, thu sawiin, Rengdil khuain kum za a tling ta chu lawmawm a tih thu sawiin, "Rengdil khuaah 4th IR hmunpui puitlin ngei," a duh thu a sawi.


Rengdil kum 100na lawmna hi vawiin khan Naupang pualin hun hman a ni tawh a, zanin khan kohhran tinin Missionary Day pual inkhawm an hman zawhah Rengdil khelmualah Hranghluite pualin hun hman a ni.


Hachhek Constituency chhunga Rengdil khuain an khaw Centenary (kum 100-na), January 11-12, 2021 chhunga an lawm mek chu Hachhek bialtu MLA Pu Lalrindika Ralte chuan Khualzahawm niin a hmanpui a, Centenary lawmna programme a hawng nghal. COVID-19 in nasa taka a tihbuai mek Darlak khawtlang tan Face mask, Hand sanitizer, PPE, Digital BP monitor, Digital thermometre, Pulse oximeter leh Glove engemawzat a pe nghal bawk.

January 11, 2021 zana Rengdil Playground-a Centenary lawmnaah hian Pu Lalrindika Ralte, MLA chuan thu sawiin, "Rengdil khua hi Pathian lalna khua ni tura kum 1922 January 12-a Pathian kaihhruainaa din a ni a, a din chhan ang ngei hian Pathian lalna khua ni chhunzawm zel turin duhsakna ka hlan a che u," a ti.

Pu Lalrindika Ralte chuan hlimna chu thil tha tih mai hi a ni tih sawiin, "Hlimna hi kan duh a, kan zawng thin. Nasa taka hlimna zawng a, vakvai ta hi tam tak an lo awm tawh. Hlimna chu eng dang a ni lo; thil tha tih hi a ni mai," a ti bawk. 

Mizo mipate tan tanlak a ngaih zia sawiin, "Mizo mipate hi kan inngaihtuah nawn a tulin ka hria. Mipa kan nih anga kan mawhphurhna kan hlen em? Chhungkua kan din a, kan chhungkuaah kan mawhphurhna kan hlen em? Kan hmangaih ber kan chhungte, kan nupui fanaute hi eng dinhmun nge kan thlenpui tih hi ngaihtuah a  ngai a ni. Hmangaihna hi sawi dan dang vak a awm lo, sawifiahna awlsam ber chu inpekna hi a ni. Kan hmangaihte tan inpe lehzual turin mitin ka sawm duh che u a ni," a ti bawk.

"Rengdil hian nghah hlelh em em kan nei a, chu chu 4th IR Batallion Headquarters tih puitlin thuai hi a ni. Thuneituten kan beiseina min tihkhawtlai sak tawh lo se, a nih dan tur ang taka 4th IR Batallion Hqrs hi a rang thei ang bera min tih hlawhtlinsak turin ka ngen bawk a ni," a ti.

Rengdil khua hi Mizo thingtlang khaw lian tak, in 480 vel awmna a ni a, Mamit District a awm, Zawlnuam RD Block hnuaia awm a ni. Kuhva ching nasa khua niin, kumtin Kuhva atang ringawtin cheng nuai 600 vel an lalut thin.






Rengdil hi Mamit district Zawlnuam RD block huam chhunga awm niin, 1922 khan mei lo det ṭan niin, kumin 2022 hian kum 100 a tling ta a ni.



Video -Rengdil khaw bihchianna




Post a Comment

0 Comments