KAN NIHNA DIK TAK


By: Zairemthanga

Kuhva tawlh rûk ni ngeia hriat mana hal ral a nih chungchangah Champhai DC lakah FIR an theh lut tih ka hriat khan mak ka ti hle a, a theh luh ngamna phenah hian 'ngam huaina' a awm em tih lam chu ka hre lo. A nihna takah ka sawi ve fo thin angin Dan hi mi dang zawm atan chuan kan duh vek a, kan zawm atan erawh hnawk kan ti tlangpui a nih hi.




Thil tha pawh hi mi dang tih atan kan beisei a, kan tih atan erawh 'kan tlin ve lo' tih chhuanlam kan nei thung a. Champhai DC pawh hi hmun dangah an sawn daih ang em tihte ka ngaihtuah. Kuhva tawlh ruk chungchangah ngat chuan a huaisenzia kan hmu tawh a. En liam mai thei DC an nei khut ang em aw ka ti.! Dikna duh kan inti a, kuhva a ni emaw damdawi pawh ni se Danin a khap miau chuan a khap a ni mai a, 'kan ei duh tho si a' tih vel kha chhuanlam a tling lo. Dik taka rorelna kalpui a han nih meuh chuan kan zo lo chu a nih hi.

Dan bawhchhetute pawh hi Biak In chhungah chuan rãu ber ber kan ni a, mi dang sualna kan hmu theiin kan dikna ni-a kan hriatah phei chuan tláwm duh hauh lo kan ni. Kan hlawkna turah phei chuan dan hi a lo awm reng reng lo a, mi dang hlawkna tur a nih erawh Dan bung leh chang sawi zuah zuah thei vek kan ni. Dikna duh ni-a lang, mi huaisen Champhai DC chungah hian eng nge thleng zel dawn ilo thlir ang.

Post a Comment

0 Comments