MZP Ngur-in Zirlai ti ṭha chawimawina hlan; Zirnaah ṭan kan lak loh chuan hnam dangin min awp mai ang tih a hlauhawm - Dr ZR Thiamsanga

• Zirnaah ṭan kan lak loh chuan hnam dangin min awp mai ang tih a hlauhawm - Dr ZR Thiamsanga

 • Education hnuaia hmasawnna hna thawh mekah thil dik lo a awm nia hriat a ni a, MZP chuan a ngaihtuah dawn a, thil dik lo titute chungah MZP in hma a la ngei ang - MZP president Lalnunmawia Pautu

Aizawl | November 19, 2021: Mizo Zirlai Pawl ( MZP) Branch Ngur chuan vawiin khan Ngur khua Community Hall-ah zirlai ti ṭha chawimawina hun an hmang a, Champhai North bialtu MLA, Health & Family Welfare Board vice chairman Dr ZR Thiamsanga leh MZP General Headquarters President Lalnunmawia Pautu chuan khuallian leh khualzahawm niin an hun an hmanpui.

Khuallian Dr ZR Thiamsanga chuan, Zirnaa zirlaite ṭan a ngaih thu sawiin, "Zirnaah ṭan kan lak loh chuan hnam dangin min awp mai ang tih a hlauhawm," tiin kan ram leh hnam tan Zirna a hmasawn a pawimawh thu a sawi a. Zirlai kalkhawmte hmaah hian amah pawh harsa taka zir chho a nih thu sawiin, thawhrimna, taimakna nen Pathian hre reng chunga zirnaa ṭan laa, ṭang sauh sauh turin a chah a ni.

MZP general headquarters president Lalnunmawia Pautu chuan,  Nu leh pa zah leh thuawih a pawimawh thu sawiin, nu leh pate chu engang mi pawh nise kan zah tur a ni a, chu chu hlawhtlinna bul a ni a ti.

Ngaisan tur dik kan ngaihsan a ṭul a, Idol/Icon/Model te  kan ngaisangin an hlawhtlinnaah kan zawn a, inhmun te kan pe a, ngaihsan tur dik Zirnaa hlawhtlingte kan chawimawi tawk lo ṭhin a, hei hian kawng dik lo ah min hruai a. Chuvangin, kan khawtlang hruaitute hian inhmun pek tur dik leh zawn tur dik kan hriat a pawimawh tawh a ni!" a ti a, "Zirna lamah kan ṭan loh chuan hnam dangin kan ram ngeiah Mizo te min chimral a hlauhawm," a ti bawk.

"MZP chuan a ṭul hunah Sawrkar kan thawhpui ang a, ram tana ṭha lo an ti a nih a, a ṭul chuan kan do mai dawn a ni." a ti bawk.

All India services ah Mizo ṭhalaite tlin tam theih nan MZP chuan ṭhalai mi thiam kum hnih chhung UPSC exam inbuatsaihna kan tumsak dawn a ni.

Retheihna hian Mihring hi min hneh tur a ni lova, beidawnna hian min tichhe tur a ni lo!

Education hnuaia NABARD sum hmanga Sikul building siamṭhat hna thawha thil fel lo awm nia lang chu MZP Gen.hqrs chuan thawhṭanni hian Executive meeting ah kan ngaihtuah dawn a, zirlaite ham ṭhatna tur tichhe zawnga thil dik lo titu chu MZP chuan a chhuah dawn lo.

"Education hnuaia hmasawnna hna thawh mekah hian Mi dik lo leh pamham, dik lo taka zirlaite hi sum siam nan  min hmangtute chu MZP chuan a che che sih hlawka tiin hma kan la ang." MZP president chuan a ti.

Zirlaite hian politics kan ngaihtuahh tur a ni a, kan MLA te hian ram leh hnam sum an MLA Fund te hi an hmang dik em tih kan ngaihvena kan hriat a pawimawh, a ti a. Kan ram budget te kan ngaihven a ṭul a, ram hruaitute'n ram tana an hnathawhte kan ngen loh chuan changkang emaw inti viau chungin hmasawn si lovin kan ṭhenawm state te nuih bur mai kan la ni ang tih a hlauhawm, a ti bawk.

MZP president chuan, zirlaite chu mahni tui zawng leh thiam zawngte ngaihtuah thiam a, kan tui zawng leh mahni thiam zawngah kan kal a pawimawh a ti.

MZP branch Ngur Zirlai ti ṭha chawimawi-ah hian Ngur khaw VCP H Tawnga leh MZP Headquarters Champhai vice president Thangdeihmanga te'n thu an sawi a. Champhai DIPRO Dr Lallawmkima leh champhai district official ṭhenkhatin khuallian hi an ṭawiawm a ni.

He hunah hian zirlai ti ṭha chawimawina mi 34  hnenah an hlan a, heng zingah hian M.A 1, B.A 3, Class 12 mi 15 leh Class 10 mi 14 te hnenah hlan an ni.

Heng bakah hian Memorial Award pahnih pawl 10 leh 12 a ti ṭha ber hnenah hlan niin, B.A Mizo - top 7 Laltlanzuala Sailo hnenah Special Award hlan a ni bawk.