Nitin Zoram hmun hrang hrangah MNF zawm thar an pung zel - Robert Romawia Royte

Aizawl | October 19, 2021: Nimin October 18, 2021 (Thawhtanni) khan Zuangtui Vengah MNF zawmthar Voters 47-te chu MNF Adviser leh Sports Minister Pu Robert Romawia Royte chuan MNF party-ah a lawmlut.Thusawiin Sports Minister Pu Roberta chuan Zuangtuiah Aizawl Smart City project atangin Badminton Court 6 zet awmna World Class Badminton Hall sak tan thuai turin sanction Rs 1600 lakh chuang a awm tawh thusawiin a bul lawkah hian Futsal Ground pawh siam tum a ni a ti a, thalaite mamawh dangte pawh bialtu Chief Minister zahawm tak Pu Zoramthanga hovin kan ngaihtuahho zel dawn a ni a ti.




Lawmluhna Function-ah thusawiin MNF Adviser Pu Robert Romawia Royte chuan, "MNF party chu kum 60 chhung a dinna ngaia nghet taka ding tawh a ni a, kan hotute pawhin pawl an sawn an sawn ve lo. Kan Party President leh CM ni bawk Pu Zoramthanga chu midik leh Pathian tihmi a ni tih miten an hria a, Zoram dung leh vangah MNF zawmtu an pung mek zel a ni," a ti. MNF Adviser chuan CM bial mipuiin an bialtu an rintawkzia tilanga MNF Party an zawm sup sup chu a ropui a tih thusawiin kum 2023 MLA Election-ah chuan CM Pu Zoramthanga chakna chu a sang hle dawn tih a hriat reng tawh a ni a ti., niin MNF Party thuchhuahin a tarlang.

Minister Pu Robert Romawia Royte chuan, "Mizoram Congress pawh hruaitu an inthlak atangin a hniam nghal sawt sawt a, an Vice President tharin Congress party rei tak lo hruai tawhtute mitmei veng miah lova thu dengkhawng tak tak hmanga Congress hruaitu hmasate tihdikloh pholang zawnga public-a thu a sawi thin hian Congress dik takte rilru a tina a, mi tam takin Pu Lalthanhawla'n Congress party a chawlhsan rualin Congress party an chhuahsan ve dawn tih a chiang reng tawh a ni," a ti a. Mizoram Congress Vice President thar Pu Lalsawta chu Qualifying Round-ah 'ama own goal-in' a tla nghal der tawh a ni," a ti.
"Tuna ZPM Party-a an hotute hi Mizo mipuiin an hriatchian em emte vek an ni a, Pawl thar a lo din apianga a tlar hmasaa awm fo tawh thinte an ni a, 'kalphung thar' an tih fo chu mipuiin an hmu a, anmahniah an beidawng tawh. ZPM hotute mipuiin an thlir dan chu ZPM zawhah eng pawl nge an din leh ang aw tih hi an zawhna leh mipuiin an chan mek, an chan chhuah leh ngei tur niin a lang," MNF Adviser chuan a ti.
Tuirial Bye Election-ah MNF party dinhmun a tha fal hle tihsawiin, "MNF Candidate Pu K.Laldawngliana’n sum leh therhlo hmatheh ve miah lova bial hmasawn nan theihtawp chhuah a tum thu sawia tlawm taka a campaign chuan mipui rilru a hneh a, Pathian leh mipuite zarah MNF candidate hi a tlin ngei kan ring a, Tuirial mipuite pawh MNF candidate vote tlinga sorkar malsawmna a tam thei ang ber dawng tura tan la turin kan sawm a ni," a ti bawk.
He Lawmluhna inkhawm hi Pu Lalrintluanga President Zuangtui MNF Unit III-in kaihruaiin Lawmluhte aiawh thusawi bakah MNF Block hruaitute pawhin thu an sawi bawk a ni.

Post a Comment

0 Comments