‘Mi harsa leh mi retheite tan innghahna tlak ka ni ang’ - Chalrosanga Ralte

Aizawl | October 19, 2021: Tuirial bial Bye-election Congress official candidate Pu Chalrosanga Ralte (Mavala) campaign neih chhunzawm zelin, October 16 khan North Chaltlang Unit-II intawhkhawmnaah Congress zawm thar mi 25 a lawmlut.

Chalrosanga chuan,  ‘Mi harsa leh mi retheite tan innghahna tlak ka ni ang’ a ti.


North Chaltlang hi Block Congress Committee-I lam huam chhung niin, Kawnpui khaw lam Block Congress Committee-II lamte INC Candidate hian a thawhkhatna a fang chhuak thawkhat tawh a ni.

Pu Chalrosanga chuan bialtu MLA atana thlan tlin a nih chuan a theihna zawng zawng a hlan dawn thu a sawi a, "Min thlang tling a nih chuan Tuirial bial mipuite hian hotu ni lovin in tana hnathawktu tur in thlang chhuak dawn tihna a ni ang. Ka theihna zawng zawngin in tan inpek ka tum a ni," a ti.

Tun anga lungrual taka Congress party chu an thawkho chhoh zel chuan hnehna an chang thei dawn tih a sawi a, Tuirial bialah nghet taka theihtawp chhuaha bial chhung leh mipui tana thawh a tum tlat thu a sawi a ni.

"Min thlan tlin a bialtu mawhphurhna mipuiin min pek chuan mi harsa leh mi retheite tan innghahna tlak ka ni ang. In hmaah ka ding a, harsat manganah pawh in tan ka ding ang. Pathian zarah kan lo tling a nih chuan in tan hna ka thawk ang. Kan lo vanduai palh ta a nih pawhin ka hawisan ngai lovang che u," tiin Pu Chalrosanga chuan nghet taka bial tana a din tur thu a sawi.

Post a Comment

0 Comments