CM Zoramthanga thubuai court thutlukna tuirial inthlan zawhah puang dawn?

Aizawl | October 19, 2021: Chief Minister Pu Zoramthanga eirua puhna thubuai chungchanga court thutlukna nimina puan tura tih chu Tuirial bial bye-election vote tlate chhiar zawh hnu, November ni 3-a puan turin sawn a ni.


November ni 3-a Court thuthlukna puan ni-ah hian thubuai neitu Pu Zoramthanga chu Court-a inlan ngei turin Court chuan nimin khan a hriattir nghal a ni.

Pu Zoramthanga eirua puhna thubuai hi Court of Special Judge (Prevention of Corruption Act) in a ngaihtuah a, court thuremna puan hun sawn a nih chungchanga order tih chhuahah eirua inpuhna thubuai chungchanga Court thutlukna chu peih fel vek a nih hnuah, thuremna puan hun hi sawn ni mahse thutlukna hi tih danglam theih a nih tawh loh thu a tarlang a ni.

Court chuan, Pu Zoramthanga thubuai chungchanga thutlukna puan hun atan October ni 18 chu ruahman lawk lo ni tawh mahse, Tuirial bial MLA by election neih hun a hnaih tawh avangin thutlukna puan hun chu sawn tha zawka ngaih a ni, a ti a, Pu Zoramthanga chu political party-a, nihna sang tak nei, ram hruaitu lu a nih avangin puh a nihnaah hian a eng zawng pawha thuremna kalpui a nih chuan by election neih turah nghawng a neih theih avangin thuremna puan hun sawn chu tha zawka ngaiin thutlukna siam a nih thu a tarlang.

Pu Zoramthanga hi a sum lakluh leh thil neih inmil lo leh Sihphir rama Aii puka a huana sorkar bungrua dik lo taka hmanga puh a ni a. PRISM chuan eiru ngeia ngaiin Anti Corruption Bureau (ACB)-ah thubuai an thehlut a, ACB chuan chhuizui tlakah ngaiin kum 2010 September ni 15 khan thubuai a ziak lut a ni.

- News Agency

Post a Comment

0 Comments