Chhawknghawl chi thar hmuchhuak; Benjamin Lalremsanga hming chawiin a hming phuah

Aizawl | October 19, 2021: Tunhnai khan Mizoram-ah Chhawknghawl chi thar hmuhchhuah a ni a, a hmingah Ichthyophis benjii phuah niin, Benjamin Lalremsanga hming chawiin a hming phuah a ni.

Ichthyophis kan tih te hi uchang leh uṭawk te laichin rul ang tak mai, ke neilo chi (Limbless amphibian) an ni a. Khawvel pumhuapah hian 49 species hmuhchhuah ni tawhin, India ah 15 sp.leh Northeastern Indiaah 9 sp. hmuhchhuah an ni tawh a. Kum 2009 khan Delhi University leh Natural History Museum (London) scientist te ṭangkawpin India hmarchhak pumhuap a beihpui an thlak chiam khan Manipur leh Nagaland aṭangin chi thar (new species) 3, Ithyophis khumhzi, I.moustakius leh I.sendenyu an hmuchhuak a. Hemi kum vek hian Zoological Survey of India (ZSI), Shillong a scientist te chuan species thar anga ngaih 3 Garo Hills, Meghalaya aṭangin an hmuchhuak ve bawk a. NE India a heng species 9 zinga species 3 (I.khumhzi, I.moustakius & I.multicolor) te hi Mizoramah an awm ve ngei a ni tih finfiah a ni tawh a.

Tunhnaiah Mizoram hmun hrang hrang aṭanga chhawknghawl Developmental Biology & Herpetology Lab., Dept.of Zoology, MZU a kan vawnṭhatte ngun takin an pianphung (morphology) leh chifang (DNA) te kan zirchian leh hnuah chi thar (new species) a awm ngei a ni tih finfiahin American Herpetological Journal, Amphibian & Reptile Conservation (ARC) chuan ni 17.10.2021 hian min lo published sak ta a ni.

He thu lakna HT Lalremsanga chuan, "He chhawknghawl chi thar hmingah hian kan thlakhlel leh hmangaih êm êm chunga kum 2020 a Lalpa hnen a chawl ta, ka u  fapa (nephew), Benjamin Lalremsanga (Benji) hriatreng nan a hmingah  Ichthyophis benjii ti a phuah a ni." tiin a tarlang.

Authors: Bza Chawngthu , Lal Muan Sanga, Vabeiryureilai Mathipi , Gospel-a Hmar 

Link: http://amphibian-reptile-conservation.org/issues.html

Source: - HT Lalremsanga @ https://www.facebook.com/ht.lalremsanga/