Kum khat chhung Mobile RT-PCR hmang turin inremna thuthlung ziak

Aizawl | October 19, 2021: Nimin khan kum khat chhung Mobile RT-PCR Van Mizorama hmang turin inremna thuthlung ziah fel a ni.


Sawrkar thuchhuahin a tarla danin, He inremna thuthlungah hian sawrkar laipui aiawhin IBSD Director Professor   PK Mukherjee chuan hming a ziak a, Mizoram sawrkar aiawhin COVID-19 leh IDSP State Nodal Officer, Dr Pachuau Lalmalsawma'n a ziak thung a ni. Inremna thuthlung an ziah fel hnuah nizan khan Manipur Film Development Corporation Complex Auditorium, Imphal-ah Union Minister of State, Ministry of Science & Technology Dr Jitendra Singh hmaah MOU hi inhlan a ni.


He RT-PCR Test na motor hi buatsaih mek niin hun rei lo teah Mizoram a lo thlen beisei a ni a. He inremna hi kum khat chhung atan niin Sawrkar laipuia Department of Biotechnology in a thawktu leh tul dangte a rawn tum dawn a ni.


Dr Pachuau Lalmalsawma chuan hun rei tak ata tawh kan Chief Minister leh Health Minister ten an lo buaipui Mobile RT-PCR Van kan hmang thei tur hi a lawmawm takzet a ni a ti a. Hmarchhak state pali in an  beisei laiin Mizoram chauh hi pek kan ni a ti bawk.

Post a Comment

0 Comments