MI DAWIHZEP RUAL SAKHAW RAWNGBAWLTU HO

- Zawmsanga Sailo

     'Sir an sawn dial dial e, an sawn dial dial e thlang tiangah; An vuai zo ta zungpui ro ni na ngai e, 

Awi a pawi ngei mai chung Pathian min ngaidam rawh.' Tiin hla ka han phuah ve tak rikngawt mai chu le. A tak Pathian ram thuah hian lung a leng vawng vawng ta em a nih hi.

     Titi khawm nikhua hian Mizote hi politics a ni emaw, kohhran lam a ni emaw tha tih lohna lam sawi tur ngah tak kan ni deuh vek thin. Mahni hian tha kan tih si loh kan telna a nih si avanga langsara kan sawi ngam  loh hi kan paikuh teltul hlawm mai ni hian a hriat a, a vanduai thlak ngawt mai.

     Mizote hi tawngkam, nun leh thiltih a inthup ching zet mai kan ni a. A thatna lam a awm rualin a tha lo lama kan hmanna chu mahni lemzia pawh inhre tawh lo khawpa zahthlakin kan hmang chu a nih tak hi. A ruka kan sawisel em em, an hmuh phak lova kan kawhsawk sawkte kha an bula kan awm chuan ngaisang awm takte hian kan han awm leh vela. Saw lama kan sawi kha he lamah chuan a dang ta daih thin a ni.

      Sakhaw rawngbawltute hi a lem lamah chuan an tak berin ka hria a, an  huaisenna dawihzep tak mai hi tihmualpho a piallei thuahriat hnuai phumbo vang vang a chakawm ber. Kan nih ang kan ni ngam lova, kan nih loh ang kan ni ngam leh hle si hi a mak a ni. Zia thup kan chinga ze tha lam thup bo hleuhin zechhia zawk  lem kan chanpui thiam hlawm ta em em mai a nih hi.

     Pastor-te hmaah kan tawng dan a dang a, Upa ho hmaah kan tawng dan leh hawiher a dang a, kohhran vela kan chetnaah zethar kan nei a, kha kan tih deuh pawh kohhran aw a nih chuan tha ti miah si lovin thlum tiawm deuhte hian kan awm thei a. En tlak lem chang thiam si lo hian en tlak loh lem hi kan chang thiam hlawm em em mai a ni.

    Miin min hua ang, chu mi ngaihdan a ni lovang tih vanga thu tha leh dik thupbova a awm tam berna tur chu kohhran hi a ni ang. "Zia thup aw, zia thup aw" tih hi kan lemchanna thupui ni ber awm a ni. Pathian hlauh dan dik lovin kan intihthaih a, Pathian tak nei si lovin kohhran mi nihnaah kan in tingaihtha nasa ta mai a ni. Kohhran hi thu tha hre tam ber, thu tha hriat zawm duh lo sakhaw mi tamna berah kan siam zel e. A va pawi dawn em!!!

     Laiking nungchang sawi thin ang mai a kan sakhuana buzawl hi dawihzepna leh lemchanna inkawpa kan luah chuan a la kangral ngei dawn a ni. Kan nitin hnathawhnaah rinawmna aia dawihzep kan thiam zawk tlat fo avangin kan hnate a chhe em em a, dikna aia dik lohna chungnunna sakhaw mi ram kan ni ta a nih hi.

      Sual hnehna aia sual sawimam thiam, famkimna aia famkim lohna tuipui, mihring tlin theihna aia mihring tlin lohzia Pathian thu hre tak mai, rawngbawltute chak lohna siamthatu awm si lova inthupbo sak ching. Heng zawng zawng leh a bakte hi Dawihzepna thlarau sual ber hnathawh vek a ni. Mi dawihzep chuan thlarau sual an pai duh em em a, chu ti a nih chuan sakhaw mi thlarau sual pai kan phunuaih nuaih a nih tak ber awm hi le.