Kan theih loh tur thilah chuan kan intiam ve ngai lo; Politics hi eizawnna atan kan hmang ve dawn lova, bial mipuite tana malsawmna ni turin kan hmang dawn a ni" - Chalrosanga Ralte

'Sorkar hnathawkte tan pawh Congress sorkar a tha ber'
- PC Lalthanliana, Ex-Minister & MPCC Gen.Secy


Aizawl | October 22, 2021: Nimin khan MPCC chuan Thingdawla Congress Party Campaign Office-ah mi thar lawmluhna hun hmangin, Congress Party hruaitu pawimawhte leh INC Official candidate Pu Chalrosanga Ralte (Mavala)-ten thu an sawi.


He huna thusawitu Pu Lal Thanzara, Ex Minister, MPCC Gen. Secretary chuan, "India ram Hindu lal rama siamtumtu BJP thawhpuitu chu tuna Mizorama rorel lai MNF te hi an ni" a ti. "INC hi eng nge an nih bik inti mai thei e. Indian National Congress Party hi Christian pachal din a nih angin, vawiin thlengin chak takin Pathian hruainain a kal reng a. India ram hmasawnna tam tak thlentu pawh he INC hi a ni" a ti.


"Mizoram-ah pawh Lengpui Airport kan neih theihna tura Pathianin a hman chu Congress Party a ni. Tuirial Hydel Project tungding tura Pathianin a ruat chu Congress Party tho kan ni a, MNF Party-in an sawpchhiat vek tawh Referral Hospital dinthar leh a, mipui chhawr theiha din a, Doctor (MBBS)  zir theihna tur Medical College tha tak dintu chu Congress Party tho hi kan ni. Chuvangin, thil tak takah chuan Congress Party bawk hi Mizoram tan Pathianin a hmang leh thin," a ti.


He hunah hian Pu PC Lalthanliana, Ex Minister, Gen. Secy pawhin thu sawiin, "Keini Lunglei West bial mipuite chuan tunah hian Cabinet Minister nei mah ila, Pu Mavala kha lo thlang tling zawk ila chuan kan vannei zawk ang mawle kan ti tawh zawk" a ti a.  "Kum 2 chauh hun awmah pawh hian Pu Mavala inthlan tlin hian, nasa takin Tuirial bial hian hma in sawn phah ang tih hi kan ring tlat a  ni" a ti.


"Congress Party khan Finance Minister fel tak, Pu Lalsawta kan nei a, Mizoram sum leh pai dinhmun a siamṭha tih kan hria. Sorkar hnathawkte pawhin GP Fund chungchangah pawh buaina leh harsatna an nei ngai lo tih a hretu vek kan ni. Chuvangin, sorkar hnathawkte tan pawh Congress sorkar a tha ber" a ti bawk.


Pu Chalrosanga Ralte, INC Official Candidate pawhin thu sawiin, "Thil hi ka intiam ve vak vak ngai lo. Kan tih theih tur chinah chuan kan ti ang ka ti mai a, kan theih loh tur thilah chuan kan intiam ve ngai lo tih min hriatsak hram turin ka ngen duh che u a ni. Politics hi mahni eizawnna atana ngaitu chu a hlawhchham nghal. Kei leh ka chhungte hi chuan eizawnna atan kan hmang ve dawn lova, Politics hi bial mipuite tana malsawmna ni turin kan hmang dawn a ni" a ti. 


INC Official Candidate Pu Chalrosanga Ralte (Mavala) hian Thingdawl khuaah mi thar 84 zet a lawmlut a. Lawmluhte hi MNF atangin mi 40, ZPM atangin mi 14, NPP atangin mi 27, BJP atangin mi 2 leh neutral 1 an ni. Lawmluh zingah hian ZPM Zonu Treasurer leh Committee member 3 leh MNF Unit Adviser an tel.


Post a Comment

0 Comments