Lengpui Airport ah Alliance Air thlawhna service thar; Union Minister hovin virtual flag off programme hmang

Aizawl | October 19, 2021: Nimin atang khan Aizawl, Shillong, Guwahati leh Kolkata thlunzawmtu Alliance Air chu a service tan a. Delhi atangin Union Minister of Civil Aviation Pu Jyotiraditya M. Scindia leh Union Minister for State for Road Transport & Highways and Civil Aviation Gen. Dr. V.K. Singh, leh Mizoram CM Office atangin Health & Family Welfare Minister Dr. R. Lalthangliana leh Minister of Sports & Youth Services Pu Robert Romawia Royte te chuan virtual in an flag off a ni.


Khuallian Union Minister for Civil Aviation Pu Jyotiraditya M. Scindia chuan sawrkar laipuiin India hmarchhak state-te a ngaihsak thu leh, tuna flight connection thar siam hian chu chu a entir thu a sawi a. Mizoram chu India leh Asia chhim chhak ramte thlunzawmtu state pawimawh tak a nih thu a sawi a. Anthurium pangpar nasa taka thar chhuakin, state dang mai bakah ram pawnah thleng a thawnchhuah leh, pangpar bakah thei thlai leh thildang hrang hrang nasa taka tharchhuak a thawnchhuak (export) tura potential Mizoramin a neih thu a sawi a. Hemi a nih avang hian Lengpui airport chu passenger mai bakah cargo phur thlawhna tum hmun tichangtlung tura Ministry in a identify zingah a tel thu Aviation Minister chuan a sawi a ni.


Khualzahawm Union Minister of State General Dr. V K Singh chuan Alliance Air kaltlanga Mizoram tana air transport changtlung belh zel a ni chu a lawmpui thu a sawi a. State leh airlines te inkarah inhawng takin leh inpawh taka thawhhona tha awm zui zel se tiin, harsatna a awm palh pawhin rang taka chinfel a nih theih nan thawhhona tha nei turin a duhsak thu a sawi a. Air connectivity tha zawk siam belh turin Alliance Air mai bakah airlines dang pawh Lengpui airport thlunzawm turin hma lak zel tum a nih thu a sawi.


Health & Family Welfare Minister Dr. R. Lalthangliana chuan Regional Connectivity Scheme (RCS) kaltlanga sawrkar laipuiin Mizoramah flight connection thar a siam chu lawmthu a hrilh a. Kawngpui a ni emaw, thlawhna leh rel a ni emaw, inkalpawhna tha leh ram hmasawnna hi a kal kawp tlat a ni, a ti. India ramah thlawhna service bultan a nih atanga la awm ngailo, Mizoram leh Meghalaya inkar direct flight siam a ni ta chu lawmawm a tih thu Minister Dr. R. Lalthangliana chuan sawiin, state pahnih tan thil lawmawm tak a nih thu a awi.

SYS Minister Pu Robert Romawia Royte pawhin thu sawiin, vawiina Alliance Air in Lengpui Airport a rawn thleng chu sawrkar laipuiin regional air connectivity tihhmasawn tura a hmalakna pakhat a tihhlawhtlinna chhinchhiah tlak tak a ni, a ti a. Aizawl leh Shillong inkar direct flight a awm ta chu chanchin lawmawm tak a nih thu sawiin, state pahnih mai bakah Guwahati leh Kolkata nen thlunzawm a, khawpui pali chatlak lo a thlawhna service awm ta chuan hmasawnna nasa tak a thlen ngei a beisei thu a sawi a ni.

Nimina thlawhna service thar flag-off na ah hian Additional Chief Secretary Pu JC Ramthanga leh Principal Consultant Aviation Wing Commander (Rtd.) J. Lalhmingliana ten Minister te hi an tawiawm a. Lengpui Airport-ah Dy. Controlller, Aviation and Airline Official Pu Lalsangpuia leh AAI Airport in charge Pu Malik te'n he hun hi an lo hmang bawk a ni.

Alliance Air thlawhna hi ATR72 a ni a. Kolkata leh Aizawl inkar thlawkin, a kar lakah Guwahati leh Shillong a tlawh a ni. Thawhtanni (Monday), Thawhlehni (Tuesday), Ningani (Thursday) leh Inrinni (Saturday) ah te a thlawk dawn a ni. Alliance Air hi Air India Limited subsidiary company a ni a. India ram chhungah a service a ni.

Post a Comment

0 Comments