Champhai College graduation day Law minister-in hmanpui

Aizawl | October 19, 2021: Govt. Champhai College Graduation Day 2021, College Multipurpose Hall-a neih chu nimin chawhnu khan Law & Judicial Minister Pu T.J. Lalnuntluanga chuan khuallian niin a hmanpui. He hunah hian Govt. Champhai College hnuaia stream hrang hrang 4 atanga graduate thar mi 156 te hnenah graduation certificate hlan an ni.

Khuallian Pu T.J. Lalnuntluanga chuan mimal takin hlawhtlinna changte rilru leh thinlung taka a lawmpui thu sawiin, eizawng tlaka chherchhuaktu zirtirtute leh thawktute fakawm a tih thu a sawi a. Mahni College zir chhuahna ngeia Graduation Day a hmanpui thei chu ropui tiin, Pathian leh College zirtirtute chungah lawmthu a sawi a. Duhsak taka sawmtu College SU te chungah lawmthu sawiin, College hmasawnna kawnga hmalaknaah a theih ang zawngte a awm a nih chuan a inhawn reng thu sawiin, Eastern University Campus leh zirna sang zawka mamawhte dah tura tul angte buaipui mek zel a nih thu a sawi bawk.

College zirlaite chu chin tawk neia social media hmang thiam tura fuihin, thil tangkai tak ni mahse a hman dan kan thiam loh chuan a inkahpukchaw chho zel a, zirna leh hna dang thawh a tibahlah a, nakin zela ram economy thlenga nghawng thei a nih avangin hman dan kan thiam a tul hle a ni, a ti a. Thil nih dan dik leh thlen dan dikte zirchiang hmasa lo leh belchiang hmasa lova thu hre hmasa nih duh vang ngawta social media a tawngkam mawi lo leh dik famkim lo hmanga thil post mai mai kan ching nasa hle chu veiawm a tih thu sawiin, hei hian kan ram ralmuanna leh zalenna thlenga a tih chhiat theih avangin kan fimkhur a tul a ni, a ti a. Zalenna kan duh ang hian midangte pawh hian an duh ve a ni tih hi kan hriat thar fo a tul a ni, a ti bawk. Law & Judicial Minister chuan ram tana mi tangkai ni turin ngaihtuahna dik put tlat a tul thu sawiin, tunlaia kan rama thil pawimawh ber pakhat chu ngaihtuahna leh rilru sukthlek siam dik hi a ni a, a tha zawng leh a eng zawngin ngaihtuahna nei ila, chu chuan kan nunah beiseina nung min siam dawn a ni a ti a. Mimal nun leh chhungkuaa harsatna tawhte chu hmasawn leh chhel nana hman tangkai thiam a ngaih thu sawiin, vuivaina nei tam mi aiin midangte pui tam ho hi khawvela mihlim leh mi awhawm berte an ni, a ti bawk.

Zirlai rual nakin lawka sakhaw hruaitu, zirtirtu, ram hruaitu, officer leh khawtlang hruaitu ni mai turte chu an ngaihtuahna leh thiamnate ram tana hman tum turin a chah a. Ngaihtuahna dik neia midangte tana malsawmna ni tur leh nun tak leh belhchian dawl nei turin a fuih bawk a. Tun hma deuhin Champhai atanga mi challang leh hlawhtling tak tak an chhuah nual thu sawiin, chumi nei let leh turin thalai rualte tan sauh sauh a ngai a, thil ho mai maia hun hmang lovin tumruh leh taima taka thil tihna apiangah nasa zawka tan la turin a chah nghal bawk a. Intlansiakna khawvelah dam khaw chhuak turin theihtawp chhuah a tul thu leh a chak a piang, a chhel apiang leh dawh thei apiang dinchhuahna a nih avangin zirlaite chu theihtawp chhuah tuirn a fuih bawk a. Hnathawh hreh lo tur leh eng hna pawh tui tak, rin tlak tak, thuawih tak, dawh thei tak, chhel leh huaisen taka thawk a, beidawng mai mai lo turin a chah a. Mimal, hnam leh ram anga din khawchhuah theih nana theihtawp chhuah tura sawmin, an hma lam hun kal zel turah zoram leh hnam tana thawk turin duhsakna a hlan a ni.

Thusawitu dang Pu P. Lalhmingliana, Principal, Govt. Champhai College chuan graduate tharte a lawmpui thu a sawi a. Mi puitling leh hna zawng thei khawpa zir thiamna nei tawh an nih thu sawiin, social media a tha zawnga hmang turin a chah a. Rintlak leh hawihhawm tak chunga khawtlang, Kohhran leh NGO tana chhawrtlak ni tura tang deuh deuh turin a fuih a. Rinawm taka ram leh hnam tana tih theih angahte tlanchhe lova theihtawp chhuah turin a fuih bawk.

He hunah hian Govt. Champhai College atanga Mizoram puma rank holder pahnih, Khamkhanthawnga, 6th position, Department of Political Science leh Lalzawmliana Khiangte 7th position, Department of Economics-te hnenah khuallianin chawimawina thuziak a hlan a. College-in Department hrang hrang atanga titha a thlante hnenah chawimawina thuziak sem chhuah a ni bawk a. PS Muanga, Vice-President, SU hnen atangin thusawi ngaihthlak a ni a, PC Lalrokima, General Secretary, SU in lawmthu sawiin hun a khar a ni.

Govt. Champhai College hian nimin chawhma khan Khuallian Pu L.Khuma Varte, Vice Principal hovin Freshers' Social leh College Magazine tlangzarhna hun an hmang bawk a ni.