Tuirial bial inthlan October 30-ah; Voter 17,905 awm mek

  • Inthlan ni - October 30
  • Vote chhiar ni - November 2
  • Ding turte inziahluh hun - October 8 thleng
  • Inhnuhdawh theih - October 13
  • inthlan kaihhnawih zawhfel hun - November 5

Aizawl 28th September, 2021: Vawiin khan DC Conference Hall, Kolasibah Dr.H.Lalthlangliana, Deputy Commissioner chuan Tuirial (ST) Assembly Constituency-a Bye Election kalpui dan tur chungchangah thuthar lakhawmtute a kawm a, hemi kawnga mawhphurhna chelhtu sawrkar hnathawkte an tel bawk a ni.



Dr.H.Lalthlangliana chuan Election Commission of India-in Tuirial (ST) AC-a inthlan hun tur a puan zar tawh avangin Model Code of Conduct pawh Kolasib district pumah hman zui tur a nih thu sawiin ni 30.10.2021 ah inthlanna kalpui tur a ni ang a, vote hi ni 2.11.2021-ah chhiar tur a nih thu a sawi a. 
Inziahluh hun chu ni 8.10.2021 thleng a hawn a nih thu te, inhnuhdawh theih hun chu ni 13.10.2021 thleng a nih thu te leh inthlanna kaihhnawih a hna hrang hrang chu ni 5.11.2021 a zawh fel tur a nih thu a puang bawk a ni. 

Vote thlak ni, ni 30.10.2021 chu Inrinni (Saturday) a nih avangin kohhran thenkhat tan vote thlak hun chhung hi siam rem a ngaih dawn thu sawiin, chumi tur chuan ECI hnenah rawtna thlen a nih tur thu a sawi bawk a ni.

Dr H.Lalthlangliana chuan Tuirial (ST) Assembly Constituency chhung a hri dona kawnga Village Level Task Force Chairman mawhphurna chu hemi chhung atan hian Khua/Veng Branch YMA theuh ten an lak rih tur thu sawiin hrileng kar a inthlang tur kan nih angin ECI-in zawm tur hrang hranga siamte ngai pawimawha zawm hram hram turin mipuite a chah bawk a ni.

Deputy Commissioner chuan Kolasib district-ah hri kai pun dan chu kiam lam pan hret hret ni a a lan thu sawiin September ni 9, 2021 atanga hri kai pun dan chawh rual chu za zelah 6.7 a nih thu a sawi a, VLTF, Executive duty leh mipuite pawh inthlahdah lova tan la chhunzawm zel turin a chah a. Election duty turte pawh Covid vaccine la tawh chauh ruat tur a ruahman a nih thu leh la la lo an awm a nih pawhin la hman turin ruahmanna siam a nih tur thu a sawi bawk a ni.

Ni 1.01.2021 thleng a chhinchhiah dan chuan Tuirial (ST) Assembly Constituency-ah hian Polling Station 26 awmin voters 17,905 an awm a. Heng zingah hian mipa 8,818 leh hmeichhia 9,087 awm mek anga chhinchhiah a ni.

Post a Comment

0 Comments