"MYANMAR UNAU RALTLANTE TUMAH EITUR TLACHHAMA AN AWM KA PHAL LO" - Dr. R. Lalthangliana

Aizawl | September 12, 2021: Myanmar ram buaina avanga raltlante Mizoram chhungah an rawn lut zel a. Tun hnaia buaina thleng avangin Lunglerh khua leh a chhehvelte mahni in lum pawh luah ngam lovin Mizoram chhungah an rawn tlan lut mek a ni.

Tun dinhmunah hian Cherhlun, Ngharchhip, New Ngharchhip, Thingsai leh Bualpui 'H' a raltlan rawn lut tawh zawng zawng hi Ni 12.9.2021 (Pathianni), dar 7:00PM thleng khan mi 1252 an tling tawh a ni.

Heng kan unau mangang thlabara rawn tlante hi South Tuipui bialtu MLA Dr. R. Lalthangliana, Health Minister chuan rang takin a ngaihven nghal a, an ei tur Buhfai trip 2 a pek tur thu a sawi nghal.

Tin, Buhfai bakah, Dal bag 16, Tel case 16 bakah an bûk sakna tur Silpaulin engemawzat pek an nih tur thu Dr. Thangtea hian a sawi a. An hriselna endik turin Cherhlun PHC leh Thingsai PHC bakah Hnahthial District Hospital aṭangin Medical Team tirh an nih tur thu a sawi bawk.

Dr. Thangtea chuan, "Ka bial chhunga manganga rawn tlan lutte hi ka khawngaih takzet a, tumah eitur tlachham an awm ka phal lo a, a ṭul angin kan ngaihtuah zel ang." a ti a ni.

Post a Comment

0 Comments