POLITICS | 2023 AH MIPUIIN KAN TLIN ANG EM?

- David Sailo

Ram hruaitu pakhat chu a Bial mipui ṭhenkhatin "Rawn din a tum tawh lo a niang" an tih laiin amah chuan "2022 kum chanve vel aṭangin kan ri vut vut anga, kan tling leh mai dawn a lawm, tuna vah vah chu tih hlawhtlin tur vang nen, ba kan insiam hnem mai mai" a ti e an tia. He tah hian mipui hlimthla a lang em?

ENGNGE ILO BEISEI ṬHIN KHA?

Hetiang hmang hian a ni lawm ni kut kan lo dawh ṭhin;

'Hmarcha lawhna tur hlawhfa rawihna 2000/3000 min thehchhuah se ka tei kual ve hman deuh ang'

'Petrol man tur 2000 vel min theh chhuah se ka tlan kual ve thei ang'

'5000 min thehchhuah se kan khaw ṭhenawma kan vuavangte hnenah ka kal thei ang'

'In lo Sorkar a niha ka Work Order hûm lai hi a tlang dawn chuan ka rawn pakai thei ang'

'Waiting Shed hi ka sak dawn chuan ka che chhuak ang'

'Kan nau hi Nurse/Health Worker/Zirtirtu/Police ah in thun dawn phawt chuan kan chhungkua chuan kan zui ang che u'

'Retailer ka chan dawn chuan ka che ve thei khawp ang'

'Kan ṭhian ho tan funte man min theh chhuah ula, Vote kan la thlak lo a nia'

A tam mai. Heng hmang hian Inthlanna chu ka Birthday emaw tiin kan lo hmachhawn pui a, kan beisei ram hnuk khawih lo zet hi a hlawhtlin chuan khêl hlawhtling kan inti em em a, ram chu engtin nge an hruai tak tih kan ngaihtuah pha tawh lova, kan khuaah kan hawipir ve ringawt a, an chêtpelhna thlengin tai pawng pawngin kan ṭan ta a, kan tan chuan kan chhungkua, kan in chhung bial leka beiseina chhete thlentu chu ram hmangaihtu tiin kan chhuang em em ṭhin a nih hi. 

Heng beiseina kawngbo nen hian Ram chu kan lo thlir ṭhin a, kan thlir tawi ang angin a thlirtawi ten min hruai ve thung ta a, 'Kan ram tan, kan Bial tan, kan khaw tan' tih tal hi kan chhungkua aia hmasakin lo burpui phet tum ila, kan inkhalh lut fuh tawn ngei ang. Kan hlawhfa rawihna tur, kan chhungkaw Member hna pek, Retailer chuh tih vel ai chuan kan khaw/veng Primary leh Middle School rawp lutuk tawh te, kan Community Hall ṭhing khawng lutuk te, tui lakna ṭha pawh kan neih loh te, kan Playground chul rup te, Sub-Centre changtlung kan mamawhna te, Doctor leh Zirtirtu indaih lo rengte hi kei leh kan chhungkua, kan khawtlang leh RAM hian a mamawh zawk a sin. Chulam hawi tlat chuan 2023 ah hian rilru i siam thei tawh angem?

CANDIDATE THLIRNA -

An hausa em? Pawisa dil chi a ni em? Thusawi a thiam em? Zuitu lirthei an tam em? A tlinin eng chanvo nge a chelh phak ang? Eng Kohhran mi nge? Campaign boruak a nei lian em? Vuavang an ngah em? Politics ah mihlun leh lar sa, mikhual lo tak, Campaign naah pawh mi hriat hlawh sa a ni dawn em? tih hmangte hian kan lo teh tlangpui a.

Serchhip ah khan Candidate ṭhenkhat chuan hna te, Contract Work te an tiam a ni awm a, mahse Candidate pakhat chu USA leh Israel rama Mizote thlengin pawisa faiin an ṭanpui a, an Party khua leh veng hrang hrang a mi ten sum faiin an ṭanpui chuah chuah bawk a nih kha. Kha kha a changkang ka ti tlat.

An rawn Campaign leh dawn a, "Lo ei phet tum" kan tam chuan "Ei phet tum" bawk kan thlang tling leh maithei. Mirethei, mi lar lo tê pawh nise ram hruai tura kan awt a nih chuan kan veng leh kan khua hian lo ṭanpui ruih ruih zawk ila, "A ni ka thlan tlin hian eng Sorkar nge ka beisei ngam dawn" tih rilru pu in thlang ila, therhlo leh Contract hmanga rulh let beisei lovin RAM hmasawnna hmanga rulh let zawk beiseiin thlir zui thung ila. Chu chu kan huam angem?

Eng Kohhran pawh chu lo ni rawh se, eng anga lar lo leh Politician hlun tak tak lirthei tam taka tlan pur pur thei ni ve lo mahse, Ram a hmangaihna leh ram hruaitu tura thawhpui tur leh a hruai thlenna tur Ministry ngaihven zawkin thlang ila, kan ti sual dawn em ni?

SEM POLICY -

Avang hian kum 20 tal tawp kan che sual tawh a, State dang pianthar suau suau hnu ah Social Media 'Political Crusade' kan la ngai ṭan chauh a nih hi.

Kan Budget hian sem a Support lo tih ah hian chiang ila, sem tum Party an awm chuan 'HNAWL TUR PARTY' ah i puang tawp ngam ang u. An sem khan retheite aiin Party mite a huap zel a, kan Budget chu chaw dangral ah kan chan zo a, a pang leh lam a hêk duai a, kawng a chhia a, hlawh la thei lo an pung a, Development Work, kan veng/khua rawn thleng tur ngei kha tute funte man tur velah emaw kan sem hum hum mai ṭhin a nih hi. Chhungtin hnenah bul ṭanna tur Nuai 15 ṭheuh, chu pawh vawikhata pek nghal tur a nih ngawt loh chuan CHAW DANGRAL, hnemhnanpuina tur awmlo a ni.

Campaign laia sem dur dur mai, Party huangah pawh Sawhchiar pirna tih vela pawk tak, SUMCHHUAH hum hum reng Candidate kha lo hlau rawh. A senso a let thum vela Cover a tum leh dawn a, nang leh keia pawisa hmang ngei khan amah leh amah a in rul miah miah dawn!! Contractor tur MLA i thlang ngei ngei ang. Mi hming hawhin reilo te ah hna lian hmun 2/3 ah a thawk ngei ngei bawk ang. Ram hruai tura thlan an ni tihah chiang ila, neihin tlin mahse pawisa thehchhuah awlsam em em Candidate kha chu Contractor Cum MLA tur a ni a, Ram a hruai hman mang dawn lo, Khuallian tih vel MLA, hnathawk hman mang lo, ama Contract hna thawh buaia buai tur tih ah chiang tawh ang u.

TU HNUAIA KÛN TUR NGE?

Kohhran Upa a ni a, an thlahte hi mi fel chhungkua an ni, hminghliauna a la nei lo, YMA leh MZP hruaitu hlun ṭhin a ni. Thiamna lamah pawh Digree sang tak nei a ni a, pa in ngaitlawm tak a ni. Tihte hi tehna ṭha tak chu a ni.

2023 ah chuan chu tehna aia pawimawh zawk tehna neih hi mipuiin kan tlin angem le? Chu mihring ṭha ve tak chu tu hnuaia kun tur nge, tunge a zui dawn a, tu Principle nge tihhlawhtlinpui a tum dawn tih hi a ni. Eng anga miṭha pawh nise a kunna tur mihring hi amah aimaha kan tehna tur pawimawh zawk niin a lang tawh. Hetiang tehna hmang lovin vawi tam tak, miṭha tam tak chu kan phûm bo tawh a ni si a.

PARTY VISION -

An Party hian Zoram tan hmathlir leh ruahmanna engnge an neih a, engnge an ngaih pawimawh leh eng kawng nge Zoram min zawhpui dawn tih kan chian angai.

Mimal taka chah duh ka neih chu Zirna lam (Education) leh Thlai thar lam(Agriculture) lam Budget a dah tam ngam Party, chutiang tura ruahmanna hman nghal mai theih nei ṭha i thlir tel bawk ang u. Hei lo hi dinchhuahna tur kan neiin a lang lo. Hetiang Budget hian Khawpui leh Thingtlang a hrut rual ber bawk ang.

TLIPNA - 

A sei hma ṭhin si a, a vawi khat nan chuan duh tawk phawt ila, mipui chanvo hmang hian kan la Crusade chho tluk tluk dawn nia. Inthlan dawna ri vut vut ringawt Candidate thlangtling reng fo tur em chu kan ni tawhin a lang lo.

Kan chhungkua dah ṭha in kan State pachhe em em reng ringawt bik hi vei ranin rilru siam tawh ila, Candidate thlir ngunin min khalh Goal a tum dan leh Party anga an Vision thlengin tun atangin mipuiin chîk nachang i hre chho ṭan ang u.

- 12th September 2021