Bumna vanga December 2017 atanga lungina tang mek Mizo rawlthar Table Tennis player Lalrinpuia'n i puihna a nghak!

Aizawl | September 30, 2021: Mi tam tak chuan Mizo rawlthar Lalrinpuia, Table Tennis player Mumbai Airport a Narcotics Control Bureau te’n an man tak kha kan la hre reng awm e.


Lalrinpuia hi December 13, 2017 zing dar 4:30 vela an man a, man a nih atang khan, vawiin thleng hian hrehawm takin Mumbai Taloja Jailah thubuai rip tak nen a la tang reng a sin. 

Kum 4 dawn Jail a hreawm taka a tan hnu ah, Supreme Court chuan a bail dilna hnawl paha a  thubuai hi ngaihtuah thuai ni se a tih ve tak avangin, kha chen muthlu tawh chu, bul tan a lo ni dawn ta niin a lang a. Hetiang a lo nih takah chuan a thubuai kal chak zual theih nan leh hlawhtlinna beisei chungin Ukil rawih te a lo ngai ta a sum tam tak Rs.10 lakh+ mamawh a lo ni ta a, tanpui an mamawh tak zet a ni.
 
Lalrinpuia Chu Tunge?
Lalrinpuia (Rinpuia) hi Pu Lachhuankima leh Pi Loicy te fapa Maubawk veng, Aizawl a cheng thin an ni a. Rinpuia hi kum 11 mi a nihin India ram a Table Tennis zirna tha ber a sawi thin Petroleum Sports Promotion Board (PSPB) Table Tennis Academy, Ajmer, Rajasthan ah awm tanin he hmun atang hian Mizo te aiawhin  National Tournament te tel chhovin Cadet, Sub-Junior, Junior leh Youth Category ah te India ram champion rawn ni chho in, Gold, Silver leh Bronze Medal Naional level  pawh a vaiin 40 vel lai a la  hman a,National Championship/Tournament ah tum 7 a Champion hman a, Mizo ti hmingthatu, Mizo nih tinuamtu pakhat a lo ni thin a ni. 

India ram aiawhin khawvel hmun hrang hrang a tlawh tawh thin a, International Medal pawh 8 lai a la hman a, heng zinga 3 phei chu Champion medal an ni nghe nghe. Youth Category a khelh atang phei chuan naupangte ni chungin India Senior Team ah pawh koh a lo ni ve ta hial a, 2017 Asian Championship, China ah pawh khan India Team squad-ah  a han tel ve a ni.  Mens Singles ah pawh naupangte ni chungin India ram pum(National Championship)ah lawman 3-na la thei a ni hman a, hma hun eng tak a nei a ni.

Zofate mai ni lo India nghahfak zing a mi- Olympic hial khel thei tur a rinkai zinga mi a ni a, chumi ram thlen ngei tuma India rama Professional TT Player ho inzirna tha bera sawi Anshul Garg Academy(AGA), New Delhi a inzir mek a ni bawk.

Amah hi aia upa zahthiam, mi ze zawi leh mi inthlahrung tak mai a ni a, a fel zia leh a rilru put hmang chu a thiante hian an hrechiang hle a ni. Mi tihnuam leh midang tana inpe tak mai a ni a, mi tlawmngai tak a ni bawk. 
 
 
Bumna Thang a Awkin, A Tan Vanpui a Chim Ta
Kum 2017 December thla a lo ni a, Chutia hmasawn tuma thahnemngai leh phur taka Anshul Garg Academy (AGA) a Table Tennis training a beih sauh sauh lai chuan,  Delhi a In luaha khawsa ve thin a  mizo pui ngei mai - Rebecca Ralte (Shillong) leh Lalduhkimi (Aizawl)  te chuan  anni Table Tennis thiam ta chu Mozombique, Africa lamah a thlawn a zinna (to & fro - Air ticket free-in) an thian (mihang)te nena an buatsaihsak theih thu leh zin ngei tura an duhsak thu an hrilh ta mai a, an ni thalai chuan chutianga  a a free a zin thawven theihna hun(offer)remchang an nei ta chu an lawm hle mai a, tichuan phur takin Mozambique ah chuan an zuk kal ta a ni. A thianpa sawi danin khulai velah pawh Mizo hmeichhe 2 te thian mihang ho in an lo buaipui a, an polite in an chungah pawh an lo tha hle niawm e. 
 
An haw a lo hun ta a, an thian dun haw na tur ticket an neih sa December ni 8 chu, engemaw airlines lamah harsatna a awm avangin tih danglam (cancelled) a ngaih thu leh tihdanglam a tul thu te. Ticket thar ni indawtin an thiandun tan an laksak leh tak thu chu Rebecca Ralte te thiandun chuan an rawn hrilh ta mai a, mak an ti viau nghe nghe. An ticket lak thar ang chuan a thianpa chu December ni 11 ah a lo haw hmasa ta a ni,  Rinpuia erawh chu  ni 1 a tlai turin, December 12 atan ticket laksak a ni ve thung a,  hetia a rawn haw dawn hian Mihang lo buaipuitu ber chuan, Rinpuia hnenah an thianpa (Mi hang) Delhi a awm bungrua, thawmhnaw lum tlem a zawng awmna Trolley Bag Sen  thawn a duh thu leh Delhi a thlen hunah, an thianpa chuan  Rebecca Ralte te nen an lo lam tur thu hrilhin, hawn sak hram turin a ngen ta a, a ni chuan a chhungte an han check thuak thuak  a, thawmhnaw tlem azawng chauh a lo ni bawk nen, tlawmngaiin chu trolley bag sen chu a rawn hawpui ta a ni. Chutih laiin Narcotics Control Bureau lam lah chuan an agent te kal tlangin report an lo dawng thlap mai si, Mumbai Airportah an lo chang ran mai a, December ni 13 zing dar 4:30 vel a lo ni a, Ethiopian Airlines lo  tumin Rinpuia chu ama pual Bag dum ak chungin a lo thleng a, belt no.9 a checked-in trollley bag sen  rawn vir chhuah a chan lai pawh chuan a man tumtute chu a bulah an lo awm reng tawh a, trolley bag sen a lak veleh chuan an man ta nghal a ni. A bul pindanah chuan  hruai lutin a bag a thil awm an zawt a, a ni chuan Chu bag senah chuan thawmhnaw bak a awm loh thu leh mi thawn a nih thu te, Delhi a an lo lam tur thu te a hrilh a. An han bun a a sawi angin thawmhnaw tlem chu a ni mai a, mahse NCB te chuan uluk takin an han check a, bag chhunglam zipper chu an han hawng a a tet  thui phui thar leh na hnuhma te, leh screw a kilh hnan thlap chu an han hmu ta a, bag chu an zai tet a a chhungah chuan lehkha buang a tuam chhungah plastic/sarang eng(yellow) phek thlarh leh fel taka intuam ruihhlo (methaqualone) chu an hmu ta mai a, an han buk a 3.900 kg zet a lo ni leh nghal a. Rinpui atan Vanpui a chima Mumbai Taloja Jail hreawm takah dah a ni zui ta nghal a ni. 
 
 
*Engtin Ni Ta Zel Maw?*  
A mantu ten thubuai rip tak an siamsak zui ta a, Narcotics Control Bureau(NCB) Delhi lam ho chuan AGA, New Delhi a Rinpuia room te an lo luh ve chilh bawk a, uluk takin an lep se a, mahse rinhleh tur thil pakhatmah hmuh tur an nei lo thung.  Hemi rual hian Rinpuia te zinna ngaihtuahsaktu Rebecca Ralte, Shillong, Lalduhkimi, Aizawl leh an thian mihang te chu man tumin Delhi, Shillong ah te NCB ho an feh chhuak nghal a, mahse, anni hi an lo bik bo hman zel thin avang leh an tlanchhiat reng avangin, tun thleng hian man an la ni lo a, tun thlengin WANTED an ni ta a ni. Aizawl Police te pawh Mumbai lam hian Lalduhkimi chungchangah hian lehkha an rawn pe ve bawk a ni.
 
Hun a lo vei a, Rinpuia chu thubuai rip tak nen Covid hri karah Jailah hun a hmang chho zel a, a chhungte leh amah lainattu, duhsaktu leh a thiante, Mizoram Table Tennis Association(MTTA) hruaitute leh Mumbai Mizo hruaitute in dawrin Ukil te ruaiin Bail a chhuah dilsak a ni a, High Court thlengin dil a ni a, mahse hnawl a ni. Hun a lo kal a Mizoram Table Tennis Association chuan an player tan hian hma la thar lehin, anmahni  chhung leh mi thenkhat ah  thawhlawmte an han khawn a, Bail dilna High Courtah an thlen thar leh ta a, mahse a hlawhtling leh ta lo a. Beidawng lovin India ram rorelna sang ber Supreme Courtah an zualko leh a, hearing vawi 4 neih hnu ah Supreme Court chuan September ni 7 khan order siamin, bail hi a phal sak lo leh ta a ni. 
 
 
*Khai Le, Kan Ban te lek Chhuakin Rinpuia chu I Kai Ve I La*  
Kum 4 dawn Jail a hreawm taka a tan hnu ah, Supreme Court chuan a bail dilna hnawl paha a  thubuai hi ngaihtuah thuai ni se a tih ve tak avangin, kha chen muthlu tawh chu, bul tan a lo ni dawn ta niin a lang a. Hetiang a lo nih takah chuan a thubuai kal chak zual theih nan leh hlawhtlinna beisei chungin Ukil rawih te a lo ngai ta a sum tam tak Rs.10 lakh+ mamawh a lo ni ta a, tanpui an mamawh tak zet a ni.  A nu leh pa hi Sorkar hna nghet vuan lo, a pa hi MR a thawk niin a nu hian a rem rem a thawk mai kha a ni a, anni chhungkaw tan chuan mittui tlak mai loh chu tih ngaihna a awm ta lo a ni ber mai. A nu leh pa hian loan Rs 100000/- lak an tum thu leh pe thei tur Bank an hmuh tawh thu chu an sawi a, mahse Nuai khat hian awmzia a nei thui tehchiam si lo. Rinpuia lainattu zinga mi thenkhat te chuan, khawnge mi inphal te’n an neih  leh phal ang tawk sum hmanga Rinpuia an tanpui a, a ban a an kaih ve theih nan tiin ‘Rinpuia Puitu Group (RPG)’ an din ta tawp mai a,  anni (Group) kaltlang hian kan ram leh hnam tan a Table Tennis Medal min rawn hawnsak thintu, mizo te min tihmingtha thintu, tuna mangang leh hreawm taka Jaila hun hmang mek Lalrinpuia hi kan  tanpui ve thei a, kan lo kai ve thei a ni tih mipuite hnenah kan han au chhuak ta pawp mai a, chhang turin kan han insawm bawk a ni e  
 
A hnuai a Bank account tarlan emaw Gpay tarlan hmang hian Rinpuia tanpuina sum hi a duh tan, mahni remchan leh phal ang a thawh theih a, kan han tarlang e.

Lalrinpuia Puitu Group
Account No - 97012784366
IFSC - SBIN0RRMIGB
MRB, Mission Vengthlang Br
Bank Transfer - 97012784366

Bandhan bank AC details

Name : Zorema
Ac : 50210001036280
IFSC : BDBL0001697
Aizawl Branch
G pay : 9089524160

RINPUIA PUITU GROUP :

Chairman : Lalhmingliana Colney
Secretary : Zorema Pachuau
Treasurer : Lalneihkimi

MEMBER TE :
1. Pu Vanneihthanga Vanchhawng (LPS)
2. Tv. Jeje Lalpekhlua (Fottballer)
3. Pu TBC Zaithanpuia (Gospel Singer)
4. Pu Zoduha (Chaltlang Lily Veng)
5. Pu VL Sawma (President, USAM)
6. Pu Lalduhkima Sailo (Secretary, USAM)
7. Pu C. Lalrinzuala (President MTTA)
8. Pu PC Lalrinpuia (Vice President MTTA)
9. Pu R. Lallungmuana (TT Coach)
10. Pu R. Lalsangzuala (Jt. Secretary, MTTA)
11. Pu Remlalhruaia (Treasurer MTTA) 
12. Pu F. Lalramdinliana (Fin Secy MTTA)

Post a Comment

0 Comments