COVID-19 | District tinah RT-PCR laboratory dah a ni dawn” – Health minister Dr Thangtea

Aizawl | September 30, 2021: Health Minister Dr. R. Lalthangliana chuan RT-PCR laboratory la din lohna district dang zawngah din turin sawrkarin hma a la a, ruahmanna a siam tih nimin khan a sawi. Health Minister hian RT-PCR khawlte hi district dinhmun leh hmunhmate thlirin a tahtawlin bun a nih tur thu leh a tul ang ang bawhzui nghal char char a nih thu a sawi bawk a ni.


Nimina SAD Conference Hall, MINECO-a Health Minister hova sawrkar mipawimawhte thukhawm hian COVID-19 hri kai na zualte enkawlna tur Intensive Care Unit (ICU) siam belh chungchanga hmalakna kal mek an thlirho a, Civil Hospital, Aizawl-a ICU ward siam meka thawk tur nurse 25 sawrkarin a lak fel tak avangin khum 10 chu hman nghal theih tura engkim peihfel tawh a nih thu tarlan a ni a, khum 10 dang chu oxygen gas pipline vuah fel a la ngai a, a siamtu company te nen indawr mek niin, reiloteah hman theih a nih beisei a ni bawk. Civil Hospital, Aizawl-a ICU ward tharte hi a tul dan azirin COVID-19 hri kaite pawh enkawl theih tura tih a ni. Civil Hospital, Aizawl-ah hian Medical ICU khum 5 a awm mek a, tunah hian 25 ah tihpun a ni dawn ta a, reiloteah Pediatric ICU khum 4 leh Obstetric ICU khum 4 awmna peihfel a ni dawn bawk a, heng zawng zawng peihfel a nih hunah chuan ICU khum 33 a awm tawh dawn a ni.

Dedicated COVID Hospital- Zoram Medical College-a ICU khum 34 awm mek bakah khum 20 dang dah belh tura hmalakna pawh tluang taka kalpui niin, ICU ward thara thawk tur nurse 50 sawrkarin a la mek a, reilote ah ICU hi hawn theih beisei a ni bawk a, ICU ward thara thawk tur staff dang lak tawh sate pawh training pek vek tawh niin, ventilator rawn vuah tur Company technician te chu naktip (zirtawpni) hian an rawn kal dawn a ni.

Civil Hospital, Lungleiah pawh a remchan dan ang angin ICU ward, emergency-a siam mek a nih thu tarlan a ni a. A rang thei ang bera hman theih tura theihtawp chhuah mek a nih thu tarlan a ni.

Nimin meetingah hian Health & Family Welfare Board Vice-Chairman Dr. ZR Thiamsanga, MLA bakah Health department leh Fiinance department hotute an tel a ni.

Post a Comment

0 Comments