Aizawl | September 30, 2021: 'Justice for Zothansanga' hmalakna kal zelah 2018-a zahawmna bo thaka sawisak nia sawi Zothansanga tan rorelna dik hmuh tumin an bei mek a, Court-a an chungthu rel hun tur chu Thawhtanni hian sawn a ni.
Hemi thu kal zelah pawikhawihtua puh Zodinliana nupui Hannah Khiangte-in Social Media-a post a siam viral ta chu i lo chhiar ve atan kan han dah e.
September 13 atang khan September 29 ah court tura tih ni mahse, court ni a nih loh vangin October 4 hian court hearing neih leh tura tih a ni. Social media-ah #justiceforzothansanga hman a ni nasa hle a ni.
Justice for Zothansanga puala kawngzawh Video:
Ka pasal Zodinliana chungchangah thu diklo tam tak Social Media ah thehdarh in awm a. Court a thu kal lai mek a nih avangin kan ngawi a. Keini chuan rorelna dik kan beisei avangin court thuchhuak kan nghak a. Mahse ti tak a diklo tak a min puh chhiatna avangin sawi ve tha in ka ngai a. Dawhthei tak a min lo chhiar sak chhuah sak turin khawngaih takin ka ngen a che u ani.
DAWT HMANGA PUHTU ZOTHANSANGA'N A DAWT SAWI A PUANG ZEL
Zothansanga'n dik lo taka min puhna chungchangah verther takin social media lamah zual kovin, a chhe thei ang bera puh ka ni a. Kan hriat angin social media-a thudik lo darh chu engmah finfiahna awm lovin a chhiar a piangin theihtawpin min diriamin min sawichhe zui a. "Ram dan a awm alawm," tiin dan ang taka thudik tarlan duhin mite kan rawn ve a. Hetiang thubuai hi Court a thlen tawh chuan comment ve a thiang lo va, dan chuan dik takin ro a rel dawn a ni ti a min rawn angin, zah tak leh hrehawm ti takin kan ngawi ta a. Thudik leh saihlum a nget ngai hlei nem kan ti a ni.
Amaherawhchu, inkhing pahnihte buainaah hian thuhretu an awm a. A sawi chak chak, a daw thei thei an chak ringawt dawn a nih chuan, dan rorelnain kan ram leh hnamah hian awmzia a nei lo a ni ang. Chhe thei ang ber leh a lungkuai thei ang ber leh mipui rilru-ah anmahni thiam inchan tir a, an tan theihna tura social media kal tlanga an zualkonaah hian thudik a awm lo va. Mahse, kan hriat theuh angin, a tirah nasa thei ang berin thu an tlangthan tir avangin, social media lamah hian kan hneh ta lo va, Mizoram mipui rilru-ah chuan misual ber chan kan chang a, rilru a na hle a ni. Thiam thu hi ka la sawi ve ngai lo a, mipui ten a min diriam thei tur ang berin dawt in Zothansanga nu in min han sawi ta chu, thiamthu hi sawi a tha a ka hriat avangin ka sawi ve ani.
Zothansanga hi social media lama an tarlan hi a dik a nih chuan drugs addict leh zu in mi a ni a. An khawtlang hotute pawhin drugs avanga an koh a, an zilh tawh a ni. Zothansanga hi nupui nei tawh, then tawh, fa pawh nei tawh ani a. Drugs addict leh ruihhlo avanga khawtlang pawhin an zilh fo tawh thusawi hi mipuite'n kan ngaihthla dawn a nih chuan, a side B pawh hi ngun taka min ngaihthlak sak a, min ngaihtuah pui ve hi mi pangngai tan chuan thil tih ngei turah kan ngai a. Kan thubuai hi "Zothansanga sawi Vrs Kan sawi" a nih tlat avangin, mipui hmuha insawi thiam, intilang khawngaihthlak thiam ringawt thiam channa tur ni lovin thudik takin ro a relna ni ngei se kan duh tak zet a. Hetianga fim taka ngaihtuahna seng a, he thubuai hi social media-a lan ang ngawta lo rel a, thiam loh min chantir mai lo tur leh thudik tak hmanga buaina chinfel a nih theihna turin mipuite pawhin lo ngaichang turin kan inngen duh a ni.
Zothansanga hian dik lo takin mi 2-te dawt muhlumin puhin min hek a. Amaherawhchu, a nu statement leh mite min diriamnaah reng reng hian hming pakhat chiah a lang zel a. In ang chiaha mi pahnihte min puh reng laia hetianga mi pakhat chauh an beihna chhan hi kan ngaihtuah ngai em? Kha thil thlen hun lai kha Mizoram Inthlanpui dawn a ni a. Kan chhungte zingah MLA candidate te an awm ve avang leh ka pu pawh politician a lo nih ve thin avangin amah khingtu party lamte fuihpawrhna dawngin, verther takin politics hmanrua-ah an hmang niin a lang a. An BJP candidate, social media lama invawrh lar tak pawh Zothansanga tana meizang hlaptu zingah hian a tang zel ta nghe nghe a. Mahse, he thu social media lama sawidarh hmasatute khan Zothansanga leh a chhungte min puhna chu dawt chiang tak a ni tih hriain an inthiarfihlim san hmak ta nih hmel.
ZIP hotunu hi Zothansanga nuteii Zairemveli a ni a. Zairemveli fapa kha Aizawl South - 1 BJP MLA candidate a ni.
He thubuai hi chin fel thuai thuai ni se; dan ang taka rorelna thleng thuai se tia beiseina nen kan thlir mek laiin Zothansanga hi vawi 5 lai court-ah hian koh a ni chung hian a inlan duh tlat lo va. Kan theih ang angin min puhna dik loh zia evidence te kan lak khawm ve-ah hian Zothansanga thusawi dik loh zia mit ngeia hmutute, court-ah pawh thudik witness tur te kan hmuh ve zel avangin, a hlauthawng ni berin a lang a ni.
Hetianga min puh chungchangah hian Police te nen kan insual buai a tihna hmun hi spot verifcation neiin kan kal hlawm a. Mahse, amah kan vel niawmna a sawina hmunah hian hriam hrei chelek tia a sawi lan thingfak leh bottle keh tih vel hi pakhat mah hmuh tur a awm lo. Dawt a sawi tam tak zingah hengte hi court-ah a dik loh zia a inpuang tawh nghe nghe ani:
1. Zothansanga hian court-ah Chanmari-a mi an sual rawnnaah engmah a tel ve loh thu leh, a thelhtu-ah a tan thu a sawi a. Mahse, Zarkawt veng CCTV footage (Regency hotel kawt) atangin chiang taka a lan ang hian (ref. video a awm) amah ber hi mi sual rawnnaa attack -tu a ni a. An pawh then hnu-ah pawh ama hmel pawh chiang takin a hmuh theih a; va khawih leh tumin a pan nghe nghe a ni. Court hmaah pawh video evidence a awm tih hre lovin chiang takin dawt a sawi a ni.
2. An insualnaah a kawr a thler phah lo ni ang a sawi hi a thu zukin, a kawr pawh a thler thu a inpuang
3. Zothansanga'n a chunga thil tisual tia a puh No.1 hian 'silaia min tinin car-ah min luh luih tir' tiin a sawi a. Mahse, court-ah 'Min luh luihtir lo va, min sawm a, ka lut a ni" tiin a dawt sawi a puang.
4. Zampuimanga thlan an thlen hian car seat hnungah a thu a, amah ngeiin kawngkhar hawngin, car atangin a duh thuin a chhuak a ni tih a sawi. Hei hi a tirah tharum leh vauna hmanga chhuah luihtir niin a insawi a. Dawt a nihzia amah ngeiin a puang a ni.
5. (#11) A tira police ten thu min zawhnaah 'thil tisualtu no. 1 tia puhin a kekawr a hlip niin ka hria' tih ka sawi nain, thudik tak chu hei hi a ni. A kekawr a phelh ka hmu lo va, a phelh lai pawh ka hmu lo hrim hrim bawk tiin.
6. (#22) Railing vuana ka kun laiin ka mawng tamah min pet a, railing pawnah ka tla nia ka sawi kha thu dik lo a ni.
7. (#27) World Bank Road-a beer in laiin, tisualtua puh no.1 khan insual buainaa telte hming min zawt a, mahse, ka hrilh lo.
8. 10. (#33) World Bank Road-a kan kal lam leh haw lamah hian heng mi ka puhte pahnih hian ka chungah tharum engmah an hmang lo tih hi thudik a ni e.
9.(#34) Ka mi puh pahnihte hian kan inhriatthiam lohna sawifel tura min sawm angin an bulah hian ka kal ve a ni tih hi thudik a ni.
10. (#35) World Bank Road-ah hian ka mi puh pahnihte nen hian kan in sual buai miah lo tih hi thudik a ni e.
11. (37) Spot Verification kan kal hma hian police te hian Aizawl PS-ah kal turin min hrilh a, mahse, inlan hun an sawi kha ka hrereng tawh lo.
12. Zing dar 10-ah PS thleng turin min ti a, mahse, dar 1:00PM -ah ka thleng chauh.
#Justice for Zothansanga chungchanga 2019 a Hriata Chhangte -in a post hi kan han dah leh e:
JUSTICE FOR ZOTHANSANGA, JUSTICE FOR ALL
Case Update:
Dt 17th April 2019
Tun dinhmun ah he Case hi Chief Judicial Magistrate (CJM) ah a awm mek a, CJM hian Delivery of Documents atan Dt 4th Apr 2019 kha a ruat a, hemi ni hian Accused te, Zodinliana leh R.Lalhruaitluanga te hi an rawn in lan lo. Accused te hi an rawn inlanloh chhan ni a lang chu hemi atan hian Summon pek an nilo hrim hrim a ni !!!
CJM hian Delivery of Documents atan hian Dt 21st May 2019 a ruat leh a, hemi atan hian CJM/Police te hi Accused te Summon pe ngei tawh tur in PEOPLE'S UNION FOR JUSTICE, MIZORAM chuan a beisei a ni.
Delivery of Documents hi tihfel a nih hnu ah he Case hi Session Court a ngaihtuah tura pek a ni ang.
PEOPLE'S UNION FOR JUSTICE, MIZORAM chuan he Case hi a bawhzui reng a. He Case ah hian RORELNA DIK a thlen theih ngeina tur leh, thil tisual tuten an phu tawk hremna an hmuh ngei theih nan PEOPLE'S UNION FOR JUSTICE, MIZORAM chuan atawp thlengin hma a la zel dawn a,
Rorelna Dik a thlen ngei theih nan a People's Union hmalakna hi min support tur in mi zawng zawng kan sawm e.
sd/-
Hriata Chhangte
Chief Convener
PEOPLE'S UNION FOR JUSTICE, MIZORAM
sd/-
Joseph Lalnunmawia
Members Secretary
PEOPLE'S UNION FOR JUSTICE, MIZORAM
An thu leh hla a van in kawlkalh ta neihnuaih ve mawle !!. An thu leh hla hre chiang tu tur te ber chu, an mahni pathum kha an ni ngei ang. Mipa leh mipa te chu thuthup nei lovin mipa tak ve ve in thudik chu sawi dun maise, thiam zawk nih in chuhna boruak hian, ram leh khawtlang an tibuaiin an ti mualpho rei mai mai ka ti. An thu hla hi tiang a nih chuan a la dai mai lo tawp ang.
ReplyDeletePost a Comment
He post chungchanga i ngaihdan lo sawi ve rawh: