PATHIAN THU CHU NGHET TAKIN VUAN RAWH

- Rick Warren
- 4 August, 2021


“A khawngaihna thuchah chuan … a siam puitling thei chein Pathianin mi zawng zawng tana malsawmna a neih pawh a pe thei che a ni.” Tirhkohte 20:32 (GNT).

Pathian thu chu i ei chuan, i ṭhang ang. Bible hi i thlarau chaw a ni. Taksa chakna siam thei ni si lo i ei fo chuan i hrisel lo ang. Chutiang chiah chuan Pathian thu thutak i ei fo loh chuan i thlarau a hrisel thei lo ang.

Pathian malsawmna zawng zawng te hi dawn vek i duh em? I dawn ngei ka ring! Kei ngei pawhin ka duhsak che a ni.

Chung malsawmnate chu engtin nge i dawn tak ang? Chungte chu thlarau lama puitlinna rahchhuahte hi an ni. Bible chuan, “A khawngaihna thuchah chuan … a siam puitling thei chein Pathianin mi zawng zawng tana malsawmna a neih pawh a pe thei che a ni” a ti. Tirhkohte 20:32 (GNT).

Khawngaihna Thu chuan a siam puitling ang che. Thlarau lam puitlinnaah i ṭhang zel a nih chuan, Pathianin a malsawmna zawng zawngte chu a pe thei che a ni. Thil ṭhenkhat nausen emaw naupang emaw i pek theihloh thil a awm ang, a chhan chu an la puitlin tawk loh vang a ni. Chutiang chiah chuan, Pathianin thil ṭhenkhat pek duh che a nei a, amaherawh chu i puitlin hun atan tiin a la nghak a ni.  

Thlarau lama ṭhanglian tura Bible i hmana i hriatreng theih nan i kut kha i hmang ṭangkai thei a ni. Pathian Thu chu i ei zel theih nan thil paruk i tih a ngai. Pathian Thu i hriaa -  chu chu i kut zungte. I chhiara – chu chu kut zungte u. I zir a – i kut zunglai. I vawnga – chu chu i kut zungchal. Chutichuan, ngun takin i ngaihtuaha – chu chu i kut zungpui a ni. I kutphah chuan Pathian Thu i hmanna a entir thung a ni.   

Pathian Thu i ei zel theih nan khang thil parukte kha i tih zel a pawimawh dawn a ni. Pathian Thu i thlarau tana i dawn chu biak in aṭang chauh a nih chuan, i kut zungte chauh chuan i vuan nghet thei dawn lo tihna a ni. A chhan chu darkar 72 chhunga kan thil hriat aṭangin zaa 95 lai kan theihnghilh ṭhin si a! Setanan i hlimna chu awlsam takin a ruksak thei dawn che tihna a ni.  

Nitinin Pathian Thu i hriata i chhiar fo bawk chuan, i vuan nghet thei deuh anga. Setanan rang takin a rawn pawt chhuak thei dawn lo tihna a ni. I hriat bakah i chhiar bawka i zir peih bawk chuan i vuan nghet zual ang.  

Thil paruk te khi i tih vek hnuah chuan, Pathian Thu chu nghet takin i vuan thei ang. Tumahin an laksak thei lovang che. Tichuan thlarau lama puitlinna kawnga ṭhanglian zelin malsawmna pawh i dawng zel dawn a ni.

Han ngaihtuah la

Ṭhang tur chuan, nitinin Pathian Thu nena inpawlna hun i neih a ngai. Nikhatah minute nga lek hun inpein bul ṭan la. Bible zir nan chutiang zat tho chu hun inruahman bawk la, chutiang chuan kar ruk chhung nitin han ti teh le. Ziakin dah chhuak la tichuan i rin ngam tur i ṭhian hrilh ang che.

Nitina Bible i zirna tur daltu che eng nge ni le? Chungte ai chuan thlarauva i ṭhanlen chu a pawimawh zawk lovem ni? 

Pathian Thu ngaihtuah (meditate) chu eng nge a awmzia?

[Lettu: Sangpuia]

Post a Comment

0 Comments