1. Zanrei pawh an pawisa tawh lova, engkim hi a rang thei ang bera chinfel a, short cut zung zung vek an duh tawh thin.
2. An thil vei laklawh tawh hi chu an ti tut tut a, hnial leh hrilhfiah hleih theih an ni tawh lo! Mi an han tur tut tut tawh hi chuan a tirah han tang deuh thin mah ila, a tawpah chuan min nawr kal leh nge nge a, kan thil tih laklawh lai pawh ni se, hmeichhiaten min han tih chung tawh hi chuan lo in vên dân leh lo in tawng khalh dan kan haihchham vek zel tawh a, a tâwpah chuan an thu zâwmin kan tlâwm leh nge nge thin.
3. Thil vei an nei laklawh hunlai hi chu sum leh paiah pawh engmah hi tam leh âwmlo tih hi an nei tawh lova, an thil veia chu hlenchhuah a nih ngeina turin engmah ui leh zah pawh hi an hrechang tawh thin lo! An thil veia chu hlenchhuah a nih dâwn phawt hi chuan thil ho tê pawh hi ni se, Nuai hi an sawi zung zung tawh thin a. Nimahsela, hmeichhe mizia ka hriatchian em avangin ka bengkhawn/lâksak duh ngai lo.
4. Vei leh duh an neih tawh chuan a zân a zân là là a chinfel zung zung mai hi an duh tawh thin a, chuti maia thil tih theih a nih loh thu kan han hrilhfiah ngiang pawhin an benga rawngah an khung duh tawh mai mai lova, a um hian min um kal dawt dawt thin hi a ni ber mai.
5. Nimahsela, a tuk khua a lo vâra vei dang deuh an han neih leh tawh hi chuan a hma zâna an vei zawng zawng te kha hnara hlît phawi an sawi ang maiin an theihngilh hmin leh dèr thei a. Han remind a, han sawipui chiam tum pawhin msg leh call an chhâng mai mai leh duh tawh ngai lo!
6. Harsatna an han tawh chânga mi an han biak te hian kan lak atangin thurâwn lâk tum an ni em tih pawh hriat hleih theih loh hian an vei zâwng zawng zawng an rawn sawi hlawih hlawih a. An duhtâwk an in chhâk da ta maw tiha thurâwn peka hmalâk dân tur kan han sawipui dâwnin an thu ngai bawk an sawi leh chiam a, an duhtâwk an sawi ta maw tihah phone an dah leh daih zel.
7. Phone an han dah hnu pawha an thil veia chuan a la kian san mai lo a nih chuan whatsapp hian an rawn chhu zui leh ngei ngei a. Msg an han type tawh laklawh hi chuan inbox hi a rik hian a ri pawp pawp a. Chhan chu sawi loh chhiar hman pawh a ni meuh thin lo! Chutihlai erawh chuan mak ve deuh chu, vei an neih laia an in open viau lai hian kan hunâwl, kan hman remchân hunah han biak ve leh han tum ila, an lo vei thina kha an lo vei leh tawh lo a nih vaih chuan han sawipui leh eltiang tum mah ila _duh loh rài_ an sawi ang maiin an tüm leh hmûn tawh lawi si a. Koh eih hleih theih an ni leh dêr tawh thin lo!
_Hmeichhia hi zawng mak tak an ni...mak tak...!_
Post a Comment
He post chungchanga i ngaihdan lo sawi ve rawh: