KOLASIB-AH TUIZEM TIFAI MI 4 THI

Aizawl |August 27, 2021: Vawiin khan Kolasib Nursery venga Pu Vanlalsiama Parte fapate pathum chuan an tuizem chung lam tifaiin hna an thawk a, an reh rei tak em avanga ngaih tha lovin an hlawhfa chhawr, Pu Lalchhuanliana (60) Kolasib Salem veng chu an luhnaah lutin a va enfiah a, ani pawh a reh zui ve leh ta hmak mai a.

A lut apiang an reh zui takah chuan, ngaihtha lovin an va enfiah a, an pali chuan tuiah chuan an lo let phung mai chu an va hmu ta a ni.




Pic : Unau pathum vanduai te

Mizo Special Report-a Vanneihthanga Vannchhawng post in a tarlan danin, Pu Vanlalsiama te tuizem hi a herh hawna lamah hnawhtu awm niin an hria a, tui a haw tha thei lo thin a. Chumi buaipui tur leh a tul anga tuizem tifai turin Pu Siam fapate pathum; Pu Albert Vanlalhriata (40) leh a phirpui Andrew Vanlalhruaia te bakah an naupang ber tlangval William Lalduhawma (36) te chu tuizem chhungah chuan an lut ta a. An tuizemah hian tui a tam lova, khup thleng vel chauh tui a awm. Pindan (partition) lehlam, tui herhhawna block tu awm nia an hriatna an va lut chu an reh ta vang vang mai a ni. An hlawhfa chhawr Pu Lalchhuanliana ngaih thalo chu an luhnaah a va lut phei ve ta a, a ni pawh chu a reh zui ta hmiah mai a. 

Chutia an vai maia an reh tak vek avang chuan an chhungte ngaih thalo chuan an luhna tuizem pindan chu an va enfiah ta a, an vai mai chuan khup thleng lek tuiah chuan an lo mu nulh mai a ni. Pu Vanlalsiama fate pathum hi an lo thi fel hman vek tawh a, Pu Lalchhuanliana hi la chhan theihah ngaiin lakchhuah hmasak ber a ni. Rang takin Kolasib damdawi in panpui nghal a ni a. Doctor leh nurse ten damdawi leh oxygen te nen theihtawp chhuahin chhan an tum a, vawiin tlai dar 5:30 vel khan a chat thla ve ta tho a ni.

Pu Albert Vanlalhriata hi nupui fanau enkawltu niin Kolasib-ah Police Department-ah Ministerial staff-in a awm a, cashier hna thawk mek a ni. A phirpui Andrew Vanlalhruaia hi Aizawlah nupui fanau nen awmin tunhnaiah Kolasib-ah chhungte tlawhin an chhuk a. Hripui leng mekah an chhung zingah positive awmin an in quarantine hlawm mek lai a ni. 

Tuizem chhungah tui a tam lova, tlak hlumna tham a awm lo. Engvanga hetiang vanduaina hi thleng nge tih chu mithiamte chhui zui tur niin a lang a. Tuizem chhungah boruak tha lo, mihring tana hlauhawm tak a lo awm a nih ring an awm a, finfiahna erawh a awm rih lo.

- MSR

Post a Comment

0 Comments