Thingsai-ah Burma raltlante chenna tur in hnatlangin saksak; MHIP-in tanpuina leh thawmhnaw hlan!


Aizawl | July 4, 2021: Thingsai khua-ah Burma raltlante awmna tûr sak hna thawh mek chuan nimin thleng khan hnatlângin thawh chhunzawm zêl a ni.


In sakna atana châk hi mipui thawhkhawm a ni deuh ber a. Hna a kal tluan chuan Karleh lamah Pathianin rem a tih chuan sak zawh beisei a ni.


Hnatlâng thawk chhuakte thingpui inna hi Thingsai khaw chhuak hmunpui lama awmten pawisa an thawhkhawm bawk niin Thingsai FB page chuan a tarlang.


Vawiin khan MHIP Saikuti Branch (Thingsai Muallungthu Veng leh Saikuti Veng) te chuan Saikuti Venga Khawchhak unau Raltlan awmte ṭanpuina an hlan.


Heng ṭanpuina an hlante hi thawmhnaw, mutbu, pawisa leh ei tur bakah chhungkaw mamawh chi hrang hrang niin, hengte hi Khawchhak Zofate tan hian an branch huamchhunga in tinah an khawn a ni.


Mi inphalte inpeknaah lawmthu an sawi bawk a ni.

Post a Comment

0 Comments