Vairengte | July 4, 2021: Ramri buai chungchangah vawiin khan Vairengte-ah JAC on innerline Reserve Forest Demand leh khawtlang hruaitu leh NGO hruaitu te Joint meeting neih a ni a, Joint meeting chuan, "Inner Line Reserve Forest 509 Sq.miles Assam Sawrkar Forest Department in an enkawl lai mek hi arang thei ang berin Mizoram Sawrkarin la let in enkawl ve tawh rawh se." tiin thutlukna an siam.
Vawiin khan Vairengte joint VC kaihruaina in SDO(C) conference hall ah JAC on innerline Reserve Forest Demand leh khawtlang hruaitu leh NGO hruaitu ten meeting neiin resolution an siam nghal a ni.
He hunah hian JAC chairman Pu F.Ngurbiakvela hnên atangin Mizoram leh Assam ramri (innerline Reserve Forest) chûngchang hriat tur pawimawh hrang hrang leh document te hrilhfiahna leh tarlanna neih a ni Inner Line Reserve Forest 509 Sq.miles Assam Sawrkar Forest Department in an enkawl lai mek hi arang thei ang berin Mizoram Sawrkarin la let in enkawl ve tawh tura resolution pass an duh thu a sawi a ni. Vice chairman, JAC pawhin resolution pass pui tum dan sawi in CM an pawh thlen tawh thu leh inner line Reserve Forest Assam in an enkawl thin chu Mizoram kutah dah ve tawh rawh se, tih chu ziak a, Mizoram sorkar in thawn se an duh thu a sawi bawk.
He hunah hian Kolasib DC Dr. H Lalthlangliana leh SP Pu Vanlalfaka Ralte te pawhin hun hmalam ah an tel pui a.DC chuan JAC te hma lakna leh ramri a document hrang hrang te an neih avangin lawmthu a sawi bawk. Mi tam takin kah mai tur an tih thin chu chhangin inkah hi tha ber se an inkah pui daih tawh tur thu leh zophai ah pawh atul chuan kap tura firing order an pêk mai thu a sawi bawk.Tun tumah Assam lam hian awmze nei leh tum neiin an rawn che a, fing thiam taka chet lâk a ngaih ve thu a sawi a. Tun dinhmun ah kan chan chu National level ah chuan thiam kan chan thu sawiin awmze nei taka hmalak a ngaih thu leh Vairengte mipui ten Sorkar an thawhpui dan leh ramri awmze nei zawk a hma an lâk danah lawmthu a sawi bawk. Tin, Hmun dang atanga Ramri chungchanga hmalakpui dan tha ber chu Ramri duty te puih theih zawnga thilpek uar te atul thu leh ṭanrual thiam dan kan zawn tlân a ngaih thu a sawi bawk.
He joint meeting a hnuai ami ang hian resolution a siam (Passed) a, NGO leh Jt.VC ten seal chhu-in hming an sign nghal a ni.
1. Inner Line Reserve Forest 509 Sq.miles Assam Sawrkar Forest Department in an enkawl lai mek hi arang thei ang berin Mizoram Sawrkarin la let in enkawl ve tawh rawh se.
2. Mizoram Sawrkar hian ramri ah buaina a chhuah apiang a, rang tak leh a tul anga an chet chhuah zung zung theih nan a rang thei ang berin kan Police Force te hi ramri dep ah hmunpui siam in dah rawh se.
Tin, Vawiin Dt 4.7.2021(sun) a Joint VC kaihhruaina a NGO hrang hrang President te meeting chuan Vairengte leh a chhehvel veng him turin Border Defence Force din nise tiin a remti a. Joint VC kaih hruaina in committee neiin hma chak taka lak tum ani a ni a. Border Defence Force a tel tur tlangval, pa valai hmantlak tur te Joint VC leh NGO hruaitute hnenah in report theih reng a ni.
Post a Comment
He post chungchanga i ngaihdan lo sawi ve rawh: