RAMRI BUAINA: MIZORAM POLICE TE INKULH NGHET MEK ZELIN KHAWTLANG DUHNA AH AWM!

July 2, 2021: Vairengte Aitlang lui hnarlam a Assam leh Mizoram ramri buaina kal zel ah tun dinhmunah boruak tha lo awm lovin Mizoram Arm Force te pawh tawlh rih zawk angin lang mahse Serlui bialtu MLA Pu Lalrinsanga Ralte hova Kolasib DC leh khawtlang hruaitu ten duty post siamna tura an tihna hmun Pu Dara huan bul, tlang mual rem laiah an inkulh mek a ni.


Nimin lama buaina awm chungchangah a hma zana inkulhna(duty post) tur siamtu zingah mithahnemngai zual ten an chan/ṭan hmun a ṭhat zawk theih beiseiin tlang mual khat mai duh tawk lovin mual thum ah tan hmun hi an lo siam a. Khawtlang hruaitu ten inkulhna tura an ruahmanah hian an inkulh chhunzawm mek tho avangin heng tlangmual 3 zînga 2, Assam Police ho hnai lam hi nimin khan an hotute thu angin Mizoram Arm Force te hian an chhuahsan leh zawk a,an duhna lai hmun takah an la awm tho a ni. Nimina an intihbuai lai vedeo thehdarh (Viral) a kan hmuh theuh angin Mizoram ram Arm Force te hian huai taka lo hmachhawnin chaw ei a an in thlâk kual lai tak leh mi tlem zawk an awm lai anih avang te, an rawn tam hneh tak avâng te leh thil pawi zawk a thlen loh nan an hotute thu angin an in saseng mai zawk a ni. Tun dinhmunah Mizoram Arm Force te hi an inkulhna tharah hian awm nghet zêlin Arm force pawh tam zawkin an awm chilh tawh a, hetihlai hian nimin tlai lamah Assam lam hian Lailaipur lamah an Arm Force te an rawn chhawp hnai deuh avangte leh Bilaipur (Vairengte tlak lam Aitlang mawng) lam atanga te rawn nawr an tum anga report a awm avangte in heng ramri Khan hrang hrang ah te hian an in sem darh leh a, nizan khan hmun hrang hrangah hian an duty leh a ni. Tin, tun dinhmunah Mizoram Arm Force hi mi engemawzat Vairengte ah rawn thlen belh leh thu Vairengte a awm chilh mektu Mizoram DIG Pu Lalbiakthanga Khiangte chuan a sawi a. Heng Arm Force lo thlen belh te hi atul anga duty nghal zêl tura an tih thu a sawi bawk. DIG chuan nizan lam leh tun dinhmun ah hmun hrang hrang a duty an nau ten harsatna an tawh rih loh thu leh boruak pawh an that rih thu a sawi bawk
    
          Hetihlai hian nizan khan Vairengte thalai, mi thahnem tak te chu Vairengte Community hall ah kal khâwm in Mizoram Arm Force te atul anga puih theih dan tur an sawiho a. Thu dawn danin thalai lam hi chuan hetiang Assam police te ramri an lo hnaih zel anih chuan lo kah mai an duh tawh a ni. Hetihrual hian Mizoram sorkar thu chu a theih chin chinah erawh an ngai chang mek a, amaherawhchu  Assam Arm Force te hi huang tau lutuk leh an tiam chin pêl a an rawn awm chuan lo kah mai an tum tawh thu dawn a ni bawk. Nizan lam pawh khan ramri Khan hrang hrang a Mizoram Arm Force duty te hi tawiawmin thalai tam tak an duty ve a ni.


Dt.2.7.2021 (11:30 a.m)





Heng thute hi RENGKHAWPUI News aṭanga lakchhawn a ni a, Rengkhawpui hi Vairengte chanchinbu chhuak a ni.

Post a Comment

0 Comments