Kawlbem khaw pa thihna Kawlbem Students' Union-in dem

• Ngopa kut kan vawikhat tawrhna a ni lo - KSU


Aizawl | July 2, 2021: Kawlbem Students' Union, Kawlbem chuan Ngopa Ruihhlo Do pawl-in an man hnua boral an khaw pa Pu Daikhanlawma thihna chu an dem a, pawi an tih thu thuchhuah siamin an tarlang. 


Ngopa lam aṭanga thu lakna rinawm takin a sawi dan chuan, na taka kut inthlakna a awm loh thu sawiin, ruihhlo ṭhahnem tak an mansak an dawp lai velin a thaw lam harsat thu sawiin, damdawiin panpui a ni a, a boral zui ta niin thu dawn a ni.

Khual thuthanga kut inthlak  nasat vanga a na tuar lova boral ta anga sawi awm chu pawi an tih thu dawn a ni a. "Kan (Ngopa lam) kuta a awm laia hetiang chhiatna a thleng hi pawi kan ti tak zet a ni," tiin exploremizoram.com a hrilh bawk.


A hnuaiah hian Kawlbem Students' Union thuchhuah kan dawn kan dah e.






KAWLBEM STUDENT’S UNION
KAWLBEM:MIZORAM

PRESS RELEASE

Dated Kawlbem, the 2nd July, 2021

Kawlbem Student’s Union (KSU), Kawlbem , Mizoram chuan kan khaw mi leh sa, kan unaupa,  Pu Daikhanlama leh a nupui chu Ngopa Ruihhlo Do Pawl inti ten nimin(1.07.2021) khan Kawlbem pengah an man a, Ngopa ah hruai thlain, nizan dar 1:00 am velah a thi tih Ngopa khawtlang hruaitute chuan tukin(2.07.2021) khan Kawlbemah kalin an han hrilh a, a nupui pawh an sawisak nasat avangin a kaih bawk a ni. Tichuan, tukinah  Phuldungsei, Kawlbem peng CZS Camp (kawngsiam) ah an dah chho tawp a, chu  chu kawlbem lamin an va la a ni. An kuta an lak hnuah an nupa an sawisak nasatzia chu a nunna hial a lo chan ta leh, a nupui a kaih phah hial te hi kan dem takzet a ni tih Mizo mipui ten min hriatpui turin kan duh a; hei hi kan khaw mi ten Ngopa kut kan vawikhat tawrhna a ni lo tih min hriatsak bawk turin kan duh a ni.

Kum 2008 khan kan khaw pa, Pu Thangruaia chu Ngopa khaw mi leh sa te tho hian an lo sawisa hlum tawh bawk a ni. Kan lai na pawh a dam hmaa hetianga nunna an la ta mai hi kan dem takzet a, thleng nawn tawh lo se kan duh a ni.

Dan anga hma la tu tur an awm a, NGO hian mihring nunna la turin eng Dan hnuaiah nge theihna a neih kan hre duh a; mihring nunna hlut zo lo hetianga che duh te hi Dan anga an chunga na taka action lak a nih theihnan thuneitute kan ngen nghal bawk a ni.

Kawlbem Student’s Union leh Kawlbem khua hian he thil thleng hi kan dem hle a, a tawp thleng kan ṭang dawn a, Ngopa khua a hetiang mi nunrawng tak tak te chungah hian action na takin lak ni rawh se. 

sd/-
(VARLIANSANGA VARTE)
Secretary,
Kawlbem Student’s Union

Post a Comment

1 Comments

  1. Law and order keng kawh tu tur te hnen a thlen mai tur ni awm tak. NGO lam thahnem ngaih luat ah nunna chan kan awm thin hi chu a fuhlo deuh a ni e.

    ReplyDelete

He post chungchanga i ngaihdan lo sawi ve rawh: