Mizoram-ah Rul chi (species) thar hmuchhuak!

• Scientific name: Stoliczkia vanhnuailianai
• Mizo hming: Rulphusin
• Sap hming: Lushai hills dragon snake

Aizawl |July 6, 2021: Tunhnaiah Mizoram-ah Rul chi (species) thar hmuhchhuah a ni. He rul hming hi  a taksa chunglam phuhlip a sin em avangin a Mizo hming-ah 'Rulphusin' vuah a ni a. A scientific name chu Stoliczkia vanhnuailianai tih a ni.

Scientific name: Stoliczkia vanhnuailianai

Mizo hming: Rulphusin

Sap hming: Lushai hills dragon snake

Family: Xenodermidae (Mizoram ah hemi Family hnuai a rul hi chhinchhiah vawikhatna a ni)

Tur dinhmun: Tur nei lo

"He rul hi Mizoram a rul leh nungcha dang zirchianna kal zelah, vanneih thlak takin Hmangaiha Khiangte leh Isáàc ZoSâng Liána PacMan ten Phulpui khaw ramah an rawn man hlauh mai a. Systematics and Toxicology Laboratory, Department of Zoology, Mizoram University ah eng rul nge a nih tih zirchian niin. Rul vang tak Stoliczkia khasiensis ni tur a ngaih a ni a, kan lawm khawp mai. Mahse chipchiar leh zual a kan han en a, Zoological Survey of India, Kolkata leh Natural History Museum, London a a laichin hnai specimen awmte nen kan han khaikhin hnu ah, Stoliczkia khasiensis nen nasa takin an danglam tih hmuhchhuah a ni a. Tichuan, science khawvel in a la hmelhriat loh, rul chi thar tih nemnghet tur a hma lak chhunzawm a ni. He research finding hi Zootaxa journal in July ni 6, 2021 ( Zootaxa July 6, 2021) ah a pho lang ta a ni." tiin thudawnna chuan a tarlang.

Zootaxa ah hian hmuchhuaktute zingah hian Samuel Lalronunga, K Lalhmangaiha  Isaac Zosangliana, Esther Lalhmingliani, David L Gower, leh Abhijit Das bakah V Deepak te a tarlang tel.

Scientific name chungchang:

"A chung a tarlan ang hian he rul chi thar hi a scientific hming chu Stoliczkia vanhnuailianai a ni a. Mizo lal zing a ropui leh hmingthang ber pawl, Vanhnuailiana hming chawi a sak a ni. A hming hnuhnung zawk tawp a ‘i’ awm leh khi chhutsual ni lovin, science a chi thliarhran a hming pek kawngah hian dan zawm tur tam tak a awm a. Chu dan ICZN (International Code for Zoological Nomenclature) chuan scientific name hi tawng thi (hman tawh loh, hausa si), Latin tawng a dah tur a ni a tih ang leh, Latin tawngah chuan mipa lam sawi nan ‘I’ a a tawp thin avangin vanhnuailiana hming tawpah pawh hian ‘i’ belh a lo ngai ta a ni."

Stoliczkia genus hi rul vang tak an ni!

Tun a Mizoram a hmuhchhuah thar nen hian Stoloczkia genus ah hian rul 3 an awm a: Stoliczkia khasiensis, Stoliczkia borneensis leh Stoliczkia vanhnuailianai. Stoliczkia borneensis hi Borneo thliarkar ah chiah hmuh niin, museum a specimen vawnthat hi 3 chiah khawvel pumah a awm a. Stoliczkia khasiensis pawh hi khawvel pumah a specimen vawn that hi 2 chiah awmin, an hmuh hmasak zawk, an hmuhchhuahna hi kum 1970 a tarchhuah niin, a specimen pahnihna hi 1904 a tarchhuah a ni. A genus ho an van zia en hian, tun ami pawh hi tun kum 50 lo awm tur chhung a hmuh leh a nih chuan, kan vannei hle ah a ngaih theih ang.

Source:- ZRC FB group / Mizoram Wild (IG)