Mizoram Governor thar atan Hari Babu Kambhampati; Governor ni lai Goa lamah

• Union Minister Thawarchand Gehlot chu karnataka Governor atan ruat!

Aizawl | July 6, 2021: Mizoram Governor thar atan Hari Babu Kambhampati ruat a ni.

Governor thar tur hi vawiinah President Ram Nath Kovind chuan state dang 4 Governor turte nen a ruat a, Hari Babu Kambhampati hi Andhra Pradesh atanga Lok Sabha member hlui a ni.

Union Cabinet tihdanglam lo awm turah Governor te sawi danglam hmasak an ni a. Governor dinhmun sawi danglam a nih rual hial Union minister nilai chu Governor atan ruat a ni thung! 

Union Minister for Social Justice and Empowerment leh BJP Rajya Sabha leader Thawarchand Gehlot (83) chu ministry atanga lachhuakin, Karnataka Governor atan ruat a ni.

Mizoram Governor PS Sreedharan Pillai chu Goa governor atan ruat a ni a. Haryana Governor Satyadev Narayan Arya chu Tripura Governor atan ruat niin, Tripura Governor Ramesh Bais chu Jharkhanda-ah governor atan dah  ani thung.

Himachal Pradesh governor nilai Bandaru Dattatraya  chu haryana Governor atan ruat a ni a, Hari Babu Kambhampati chu Mizoram Governor atan, Mangubhai Chhaganbhai Patel chu Madhya Pradesh governor atan ruat niin, Rajendra Vishwanath Arlekar chu Himachal Pradesh governor atan ruat a ni.