Health Minister hovin Aizawl khawpuia COVID Care Centre siam belh chungchang sawiho

Aizawl | July 23, 2021: Vawiin chawhnu khan Health Minister Dr. R. Lalthangliana hovin SAD Conference Hall, MINECO-ah Aizawl khawpui huamchhunga COVID Care Centre siam belh chungchang an sawiho a. He hunah hian Medical Operational Team on COVID-19 Chairman Dr. ZR Thiamsanga, Health Secretary Pu R. Lalramnghaka, Health department hotu pawimawhte bakah PWD, PHED leh P&E department aiawhte an tel a ni.

Meeting kaihruaitu Dr. R. Lalthangliana chuan fur ruahtui tam lai a nih vangin COVID-19 hri kaite dah tamna ber BSUP CCC, Durtlang luah a remchan loh avang leh COVID-19 hri kai an pun belh nasat avangin hri kaite enkawlna tur CCC remchang dap a ngai tih a sawi a. CCC tur buatsaih kawnga a chei that hna thawhsak thintu technical departmentte PWD, PHED leh P&E chungah lawm thu a sawi bawk. Health Minister chuan DCH Zoram Medical College a awmte tan Deputy Chief Minister Pu Tawnluia’n tomato quintal 2 lai a pe chu lawmawm a tih thu a sawi bawk.

Vawiin meetingah hian Health Minister leh Sports Ministerte bakah Mizoram State Sports Council (MSSC) hotute hmalakna a Mualpuia MSSC Hostel building pahnih sak zawh hlim CCC atana ruahman fel a nih thu tarlan a ni a. He CCC hi a hmingah “Salem Veng Mualpui CCC” vuah niin building hlawm 2 (Block I & II) a ni a, heng building 2 ah hian chhawng hnih ve ve luah tur niin damlo 350 dah theihna tur a ni a, PWD, PHED leh P&E department ten a cheibawl ngai zual an tih fel hnuah luah tan vat theih a ni dawn a ni.

Hei bakah hian Falkland-a RAY building mi 300 dah theihna pawh a tul anga chei that mek a nih thu tarlan niin, department hrang hrangin chan an in sem a, hun reilo teah luah theih beisei a ni bawk.

Kulikawn Hospital chu DCHC-a hman tura ruahman a nih vangin psychiatric ward-a damlo enkawl mekte chu ITI Venga Health department buldingah sawn chhuah tura ruahman a ni a, he building hi tunah hian chei that mek niin karleh kar tirah chuan luah theih beisei a ni. Hetih rual hian Kulikawn DCHC chu PWD, PHED leh P&E department ten chei that hna an thawk mek a, reiloteah zawh fel an inbeisei a, Kulikawn DCHC ah hian damlo 50 dah theih tura ruahmana ni.

- DIPR