COVID-19 | Chhuanthar-ah test runpui nei; sample 1200 chuang test!

* Tlai dar 5 thleng khan positive 80 hmuchhuak tawh!

Aizawl | July 23, 2021: Ni 7 liam ta chhunga  COVID-19 hri kai mi 163 lai hmuhchhuah an nih avangin Baktawng Tlangnuam (Chhuanthar) ah vawiin khan State Nodal Officer, IDSP & COVID-19 Dr. Pachuau Lalmalsawma leh Pu Lalfakzuala Pautu, State Entomologist, IDSP te kaihhruaiin State IDSP leh Thingsulthliah CHC-ten a khaw pum mipuite sample an test sak.


State Nodal Officer, IDSP & COVID-19 Dr. Pachuau Lalmalsawma chuan Health Minister Dr. R. Lalthangliana leh bialtu MLA, Deputy Speaker ni bawk Er. Lalrinawma te ruahmanna in mass testing hi kalpui a nih thu a sawi a, Chhuantharah hian mi 2224 chengin vawiin tlai dar 5:00 thlenga sample test 1255 zingah COVID-19 positive 80 (6.37%) hmuhchhuah tawh an nih thu a sawi a, sample test hi kalpui chhunzawm mek a nih thu a sawi bawk a  ni.

Dr. Lawrence Lalramenga, MO, Thingsulthliah CHC-in report a pek danin July ni 15, 2021-ah Chhuanthar mi 3 te Aizawl Vanapa Hall Mega Kiosk leh Trinity Hospital ah RAgT Negative Certificate mamawhna avangin an in test a, hetah hian Positive an ni tih hmuchhuah a ni a.  

July ni 16, 2021-ah Baktawng khuaah a hma nia positive hmuhchhuahte contact ho zawng RT-PCR test neih a ni a, hemi rual hian Chhuanthar khua atangin COVID-19 Symptom nei mi 18 te RAgT test neih nghal a ni bawk a, chung zingah chuan mi 16 an positive a, SIRD 4C Thingsulthliah ah dah luh nghal an ni.

July ni 17, 2021-ah Thingsulthliah CHC leh Chhuanthar VLTF te inbe rawnin COVID-19 Positive Contact Symptom nei mi  88 chu RAgT hmanga test niin chung zingah chuan Positive mi 24 hmuhchhuah an ni a, heng zinga mi 11 te SIRD 4C ah dah luh an ni a, a dang mi 13 te Chhingchhip 4C ah dah an ni.

July ni 18, 2021-ah Chhuanthar VLTF te hnen atangin Covid 19 Symptom nei mi 1 report leh a ni a, Thingsulthliah PHC a RAgT test turin koh a ni a, result negative a ni. 

July ni 19, 2021-ah Chhuanthar VLTF te hnen atangin Covid 19 Positive chhungkua zinga mi Symptom nei mi 4 in report an awm thu dawn niin, Thingsulthliah PHC ah RAgT  test an ni a, an vaiin an Positive a, Rural Health Training Centre Thingsulthliah 4C ah dah luh nghal an ni.

July ni 20, 2021-ah Chhuanthar ah Covid 19 Symptom nei leh Positive Contact mi 188 te RAgT hmanga test an ni a, chung zingah chuan Positive 62 hmuhchhuah an ni a, an vaiin Chhuanthar 4C ah dah luh an ni.

July ni 22, 2021-ah Chhuanthar ah Positive Contact RT-PCR a test turin mi 99 sample lak a ni a, hemi bakah hian Covid 19 Symptom nei leh Positive Contact mi 199 RAgT hmanga test niin an zing a  mi 54 an positive a Chhuanthar 4C ah dah luh an ni. 

Chhuantharah hian veng pariat; Central East, Central West, Central East I, Central East II, Central East A, Central South East, Central South West leh Central Road te a awm a ni.

- DIPR

Post a Comment

0 Comments