Hripui do dan chungchangah Health Minister hovin DC leh District Medical Official –te Video Conferencing nei; sample test kit (RAgT) chungchangah harsatna awm lo!

Aizawl, 23rd July, 2021: Vawiin chhun khan Health Minister Dr. R. Lalthangliana hovin Video Conferencing neih a ni a, Aizawl district tih loh district dang 9 (Lawngtlai tel lovin) bawrhsapte leh CMO te an tel a ni.

Dr Thangtea | file photo

Vawiin meetingah hian Lunglei district tih loh district dangahte chuan total lockdown kalpui a nih loh thu DC ten an sawi a, an district dinhmun an thlirin mipuiten sawrkarin inkaihhruaina dan a siamte an zawm tha a, harsatna lian tham an la tawh loh avang leh hri inkaichhawnna an la thunun thei nia an hriat avangin COVID Appropriate Behaviour zawm chungin fimkhur takin dawrte pawh hunbi tuka an hawn thu an sawi a, VLTF leh Executive duty ten uluk taka hma an lak reng thu an sawi bawk a. Boruak awmdan azirin rang taka Containment an puan thin thun sawiin district 6 ah chuan Containment Zone puan mekna a awm lo a ni.  

Lunglei district ah erawh chuanb tunhnai kar hnih chhunga COVID-19 hri kai thar an pun nasat avangin hri inkaichhawnna chhut chah a nih theihnan khauh taka total, lockdown kalpui a nih thu tarlan niin, thingtlang khua 2 telin Containment Zone hmun 11 ah puan mek a ni.

District tinah sample test chungchangah harsatna an neih loh thu tarlan niin Lunglei district ah chuan Dawn khuaah mass testing neih a ni a, district dangah chuan sample test ngai chu harsatna awm lova an la in test theih thu tarlan a ni. CCC leh CCCC chungchangah harsatna tawk an la awm lova, vaccine pekchhuah pawh tluang taka kalpui vek niin hmun thenkhatah erawh chuan chhan hrang hrang vanga vaccine la ngam lo an awm tih sawi a ni.

Health Minister chuan inkawmhona hunt ha tak an neih theih avanga lawmawm a tih thu sawiin district tin ten COVID-19 dona kawnga hma an lak danah lawmawm a ti a, vaccine pek chhuah kawngah theihtawp chhuah chhunzawm zel turin a chah a, India rama vaccine pe kim hmasa ber State ni turin anmahni bial theuhah tan la turin a chah a ni.

Sample test kawngah hri inkaichhawnna dan chah a nih theih nan a tul dan azira sample test bei ngawrh turin a chah a, sample test kit (RAgT) chungchangah harsatna a wm loh thu sawiin an mamawh ang zat te rawn la thuai thuai zel turin a chah bawk a ni.

COVID-19 third wave lo thleng thei nia sawi laka inbuatsaih tura in hriattirna an chhuah tawh anga District tinah naupangte enkawlna tur ruahmanna siam turin a chah bawk a, PM Cares hnuaiah district tinah oxygen plant dah tum a nih thu sawii9n, Mizoram sawrkarin cheng vaibelchhe 6 vel a sen ve a ngaih tur thu a sawi bawk a ni.