I DUHTHLAN THILTE CHUAN I HUN HMAN DAN A THUNUN

- Rick Warren
- 14 July, 2021



“Kan thiltihah hian mi tin ten mawhphurhna kan nei vek a ni.” Galatia 6:5 (NLT)

I duhthlannate chu thil lo thleng palh aiin i hun tawn mekah hian mawhphurhna an nei sang zawk.

I hun hman dan chu chiang takin i hmu thei ang. I nun chiri leh buai nuaih mai chu i duh lem lo mai thei. Amaherawhchu nun buaina a lut tur hian tuman an nawr lui miah lo che, loh theih loh thil te chu thudang lo nise.

I nun kha felfai zawka hmang turin thuneihna sang tak i nei asin. A dika dik chuan i nun hman dan tura i mawhphurhnate ngaihtuah tur leh fimkhur taka i hun hman dan tur tifel turin Pathianin a beisei che a ni.

He khawvelah hian hun eng zat nge i la neih i hria em? Pathian duh zawng ti turin hun i nei tam tawk a ni. Kawng dangin sawi ila, ilo pian chhan ti puitling turin hun i mamawh tawk chu pek i ni. Pathianin i tana a ruahman ni lo a piahlam thil dang i tih khan, hunin a daih lo che emaw hun chep lutuka inhriain i awm ta ṭhin a ni.    

Hetianga an sawi hi i hre tawh mai thei. Setana chuan misualah mi a siam theih loh pawhin, mi buaiah tal a siam ṭhin. Mi buai takah a siam ang che a thil pawimawh tihna hun pawh i nei thei lo ang – Pathian nena fianrial hun, rawngbawlna leh Chanchin Ṭha thehdarhna kawngah te pawh.

Eng thil nge i thlah liam ngai le? Bible chuan, “Thil engkim tih a thiang a; nimahsela, thil engkim tih a ṭangkai kher lo” tiin min hrilh. 1 Korinth 10:23 (HCSB). Chu chu eng nge awmzia le? Chumi awmzia chu: Thil zawng zawng hi a sual vek kher lo; a ṭul vek lo a ni zawk. Hringnun chu hetianga duhthlanna hi a ni chawk “thil ṭha ka ti ang em? emaw “thil ṭha ber ka ti ang em?”  

Tun kar chhung hian i hun hman dan tur pualin ṭawngṭaina hun insiam la. Pathian hnenah eng te hi nge a thiltum tih kawhhmuh tur chein dil ang che. Chutianga i tih chuan, i thawpikna a ta i thawl hawk theih nan ka dilsak che a, Pathianin a siam chhan chauh i tih pawhin lungawina thar i neih tawh ang. 

Han ngaihtuah la

I thiltih ṭhin leh i mawhphurhna i hlenchhuah avanga hrehawm i tihna te kha ziak chhuak la. Pathianin i nuna ti tura a tih che ni lo chu i thliar fel thiam theihna turin dil ang che.

Pathianin khawi lamah nge i hun leh theihna chu hmantir che sela tih i rin le?

Pathianin i tana ruahmanna a siam chu i ngaih pawimawh zawk theih nana pui tur chein eng duhthlanna te nge i siam ngai le? 

I nunna chu Krista hnenah i hlan tawh em?

Eng thil pawh tiin khawi hmunah pawh lo awm tawh mah la, Pathian chhungkuaah chuan hmun i neia, inring rengin an nghak che a ni. Chu sawmna chu a huam zau em em a ni. Ring la lo pawm ve tawp mai rawh.

I inpeih em? He ṭawngṭaina hmang hian ṭan ang che. 

“Aw Pathian, ka thih hunah chuan ka nunna chu i hnenah a awm dawn tih ka hria a. I lakah thil ka lo tisuala, nangma duh dan ni lovin keima duh danin ka lo nung ṭhin a. Chu chu tunah hian inthlak danglama, bul ṭan thar ka duh a. Ka sualna te hi hawisana i hnen lam lo hawi ka duh a ni.  

Isua chu mi zawng zawng aia thi tura i rawn tirh avangin ka lawma, ka thiltihsual te avanga hremna ka hmuh tur chu ka pumpelh phah a ni. Min ngaihdamna chu ka phulo a ni tih ka hria. Lalpa, i khawngaihna chauh chuan min chhandam thei a ni tih ka hria. Famkimna hmuna tel tur chuan ka ṭhatna hian a tlin ngai dawn lo a ni tih ka hria.

Isu, min hmangaih em avanga ka sualna te i inbel vek avangin ka lawm e. Vanrama lut ve tlakah min siama, chuvang chuan khawngaiha min chhanchhuak turin ka dil a che. Isu, ka ring che a. Min chhandamna chu vawilehkhatah, famkimin, chatuan thlengin min tiam ang a nih ka ring e. He Lei hi ka chhuahsan hunah pawh, i Lalramah chuan ka lo zawm ve ngei ang che tih ka ring e. Isua hmingin ka dil e. Amen.”

A chunga mi ang khian i ṭawngṭai a nih chuan, hetah hian min lo hrilh ang che – Rick@PastorRick.com. Isua nena hun i hman zel theih nan thil ṭangkai tur ka lo thawn ang che. 

[Lettu: Sangpuia]

Post a Comment

He post chungchanga i ngaihdan lo sawi ve rawh:

Previous Post Next Post