Prime Minister leh Hmarchhak State Chief Minister-te COVID-19 chungchangah meeting nei

Aizawl | July 14, 2021: Prime Minister Pu Narendra Modi chuan nimin khan Covid-19 hrileng thawh hnihna chungchangah India hmarchhak state Chief Minister pariatte chu video conference-in a kawm.


Chief Minister-te hian an State dinhmun theuh te leh mamawh an neih te an sawi a. Chief Minister Pu Zoramthanga pawhin Mizoramin covid19 bakah harsatna dang hrang hrang a tawhte sawiin, vaccine tam zawk mamawh belh a nih thu leh oxygen infrastructure lama mamawh awmte a sawi a ni.

Prime Minister Pu Narendra Modi chuan COVID-19 hrik chu a insiam danglam (mutate) em tih leh variant hrang hrangte chik taka chhuizui zel turin a chah a. Hrileng thawh thumna laka lo inbuatsaih lawkna ngaihpawimawh a tul thu a sawi a. "Vaccination for All - Free for All" atan India hmarchhak state-te pawimawh thu Prime Minister chuan a sawi bawk.

Chief Minister Pu Zoramthanga hi Health Minister Dr. R. Lalthangliana, Chief Secretary Pu Lalnunmawia Chuaungo leh Health Secretary Pu R. Lalramnghaka ten an tawiawm a ni.

Post a Comment

He post chungchanga i ngaihdan lo sawi ve rawh:

Previous Post Next Post