Assam sorkar thil tih dan hi a demawm kan tih rualin, Mizoram sorkar pawh ramri humhalh chungchangah chuan innghahna tlak a ni lo! - MZP president

Aizawl | July 13, 2021: Mizo Zirlai Pawl (MZP) General Headquarter president B Vanlaltana chuan vawiin khan thuthar thehdarhtute kawmin, "MZP hi zirlaite hamthatna atana bei tura pawl din anga hriat ni mahse, ram leh hnam humhalhna leh hmasawnna turin nasa takin a thawk thova. Thangtharte tana chenna tlaka Mizoram siam hi kan tum ber zing a mi a ni bawk. Hei vang hian ram leh hnam humhalhna leh hmasawnna a nih dawn phawt chuan eng harsatna (issue) atang mahin MZP hi a tlanchhe thiang lova, kut a kuangkuah thei bawk hek lo." a ti.



Sawi chhunzawmin, "Chuvangin, kan thenawm state te nena ramria buaina kan neih pawhin Mizo ram leh hnam tan MZP chuan theihtawp a lo chhuah tawh thin a. Kan hmalakna zarah mipui leh sorkar pawhin ramri humhalh chungchangah harhtharna an chang zel niin kan hria a, kan lawm hle a ni. " tiin MZP ngaihdan a sawi.

MZP president chuan, "Kum 2018 December thla atanga MNF party in sorkarna a siam pawh khan ramri buai chinfel kawngah beiseina sang tak kan nei a; India sorkar laipui dova kum 20 chhung zet lo rammu tawh an nih avangin ramri buai kan neih chungchang pawh hi an chinfel theih mai kan ring tlat a, chu chu Mizo mipui beiseina pawh niin kan hre nghe nghe a ni. July 8, 2019 a Council of Minister meetingin Mizoram ramri atana BEFR 1875 ramri a pawm phei kha chuan kut kan lo beng ve hial a ni. Mahse, an sorkar kum 3-na kan hman mekah hian tun hma zawng aiin Assam sorkar chuan min zuam a, tun hmaa an rama an rawn chhal ngai loh hmun, Mizo ten kum za tel lo leh huan an lo siam tawhna Aitlang pawh Assam ram tiin kan mit hmuh lai ngeiin min rawn chhuhsak a, hei hian Mizo mipui rilru a tina takzet a ni." tiin a sawi a.

Mizoram leh Assam ramri chungchangah hian June ni 28, 2021 khan Delhi-ah Joint Secretary, Union Home Ministry hnenah MZP chuan Memorandum kan thehlut a. Hemi tuk, June 29,2021 atangin Assam sorkar chuan Mizoram chhungah buaina a rawn siam tan a; Vairengte bul Aitlang a Mizote lo leh huan neihna hmunah an rawn inkulh a. Aitlanga Assam Police te rawn inkulhna hi Mizoram sorkarin BEFR 1875 ramri a pawm chhung a nih avangin Assam police te an inhnuhdawh hma chuan eng inbiakna mah Assam sorkar neihpuilo turin Mizoram sorkar kan ngen a, kan ngenna chu Thuchhuah (Press Release) hmanga mipuite hriat tura kan puan bakah Chief Minister hnenah ziakin kan thlen bawk a;mahse, Mizoram sorkar chuan Chief Secretary level-ah July 9,2021 khan New Delhi-ah inbiakna a neihpui lui a, kan rin ang ngeiin engmah an sawifel thei chuang lova; inbiaknaah hian BEFR 1875 ramri chungchang pawh an sawi chhuak hek lo. 

"State pahnih Chief Secretary te inbiak tuk July 10, 2021-ah Assam sorkar chu Phainuam (Buarchep) ah Aitlanga an chetna aia na zawkin a rawn che leh a, khawl hmangin Mizote kuhva phun sa tam tak an tihchhiatsak a, a lo dangtu Mizote an vua a, hmeichhia pawh an zuah lo. Heti khawpa Mizoram sorkar rawn ngaineptu Assam sorkar thiltihdan hi a demawm kan tih rualin, Mizoram sorkar pawh ramri humhalh chungchangah chuan innghahna tlak a ni lo tih Mizo mipui hriatah kan puang duh a ni." tiim MZP president chuan a sawi bawk.

Assam sorkarin Aitlang an rawn luah hlimchhawn, June 30, 2021 khan Serlui bialtu MLA leh Kolasib DC hoa Vairengte khawtlang leh NGO hrang hrang hruaitute meeting tumin ‘inkah a tul pawhin hmalak a tum’ thu Serlui bialtu MLA hian  a sawi a, Vairengte mipui pawh an thla a muang hle a ni. Mahse, tun thlengin BEFR 1875 ramri chhung Aitlangah Assam police te an la inkulh a, Mizoram police te awmna aia changtlungin an Camp an thuam tha sauh sauh a. Kan ram chhunga inkulh Assam police te nawr chhuak tura hmalak tumna Mizoram sorkar hian a nei lova; loh theih loha inkah a tul pawha kan mamawh nghal tur doctor, nurse, blood bag leh medical equipment chhawp hnaih an nih loh bawk avangin Serlui bialtu MLA thusawi hi lemchanna a ni tih a lang a; ramri chungchangah hetiang lemchanna thu hi chhak chhuak fo tawh lo turin sorkar thuneitute kan ngen nghal bawk a ni.

Ramri ah Assam lamin min rawn nawr a, buaina a chhuah changa thu leh hla nei a Mizo mipuite min thlamuan thin tura kan ngaih kan Home Minister leh Chief Minister te an ngawi rei thei lutuk thin hi MZP chuan thalo a ti a. Kan Home Minister press conference atanga a lan danin tharum hmanga kan ram rawn luah luitu te nawrchhuah tumna a awm miahlo hi pawi kan tiin a tlawmthlak kan ti takzet a. Assam sorkarin tharum hmanga kan ram an rawn awp chin apiang hi kan chan hlen zel mai dawn em ni tih hi MZP in kan zawhna a ni. 

Mizo thalai tam tak te hi ramri humhalh duh vanga thisen hial chhuak tawh kan ni a; chuvangin, ramri chungchang lemchanna (Drama) awm thin hi MZP chuan kan haw takzet a ni. ‘Ramri chinfel dan thuruk ka hria’ titu chuan tun hi a thuruk a puan hun a ni dawn lawm ni? BEFR 1875 ramri kan humhalh ngam lo a, Assam Official te bulah pawh kan sawi ri ngam leh si lo a nih chuan July 8, 2019 Council of Minister meeting thuchhuak kha hnukdawk (withdraw) leh ngam zawk rawh se. Thusawi thiamna hmangin kan ramri hi a chhan theih lova, a tak rama huaisen taka hmalakna hi Mizo mipuite’n kan beisei a. Kan ram chhung, huan lo ram kan neihna hmun hrang hrang a Assam police rawn inkulh mekte hi rang taka nawr chhuak nghal turin MZP chuan Mizoram sorkar kan phut tlat a, chutianga huaisen taka Mizoram sorkar hi a che ngam lo a nih chuan kan ramri humhim tura Mizo thalai che chhuakte hi min dang lo ngam turin kan ngen nghal bawk a ni.

Post a Comment

0 Comments