Aizawl | June 4, 2021: Nimin tlai dar 5:30 vel khan Phunchawngah hnamdang khalh motor lian truck ke 12 nei chuan kawng an-a assam type in ding pahnih a hnawl a, hliam tuar mi 7 damdawi in pan pui an ni.
MSR-in a tarlan danin, In hnawltu truck hi Phungchawng veng kawngpui sirah nilengin a ding tawh a. Vawiin tlai dar 5:30 vel khan a hnungtawlh zawnga rawn lirin kawng sira in pahnih Pi Malawmin in, assam type chhawng khat leh, a bula assam type tho Pu Zaithantluanga in chu a rawn hnawl ta mai a. Heng in a hnawl atang hian in chhunga awm mi thenkhat chu an tlanchhuak hman niin an sawi.
Truck-in in a hnawl lai hian heng in pahnihah hian mi engzat nge in chhungah awm tih hriat chian mai theih a la ni lova. Truck-in in a hnawl takah chuan tlawmngai tlankhawm nghalin chhanchhuahna hna thawh zui nghal a ni a. Mi pasarih (7); puitling 5 leh nausen pahnih hmuh an ni. Mihring an in hmu kim tawh niin an sawi.
Truck-in a hnawl, in pahnih chim atanga mihring an lakchhuah hliam 7 te hi Aizawl civil Hospital lam panpui an ni.
Truck hi kawng thlangah a tla tel ve a, a driver hi insasengin tlan bo a tum a, khawtlang hruaituten an man hman niin thudawnna chuan a sawi.
Chhiat tawhna hi hriain mi an pungkhawm tam hman hle a. Tunlai hrileng avangin hawng darh turin an inngen a, theihtawp chhuahin in chim karah an in dap kim tawh tho a, khuain a thim hnan tak avangin, in chim bungraw senghawi ngaite chu naktuk zing lamah bawhzui mai ni se tiin khwtlang hruaitute chuan an rel a ni.
- MSR
Post a Comment
He post chungchanga i ngaihdan lo sawi ve rawh: