Hnam ropuite u, tho r'u le XVI

Lalhruaitluanga Chawngte


Ni chu a sa vawl vawl a, a sa telh telh emaw tih tur a ni. Khua pawh a lum ngang mai a, a lum telh telh emaw tih tur a ni.

Chutiang khaw lum leh ni sa țang at hnuaiah chuan Lushai Scout te chu an an tumram panin an kal a, khua a lum nak alaiin tui in tur an nei tawh lo leh ta nghal a!

Indona hmuna raldova kal an ni a, hmun ralți-a chetla, vak vak mai an ni. Chutiang hmun, hmun ralmuang lo tak, inven rân reng a ngaihna hmun, khaw lum sa vung vung hnuaiah chuan tui in tur nei lovin an kal a, chhuanlam siam lovin.

An kal zel a, ni a sa tawlh tawlh emaw tih tur a ni. An chhawl a hal deuh deuh a, an hah telh telh bawk. An tuithawlte lah a ruak tawh si.

Phai khaw lum, a hma lawka nasa taka indona, tuialhthei khur pawimawh inchuha Japan leh Britain sipai an inkahna hmun a ni a, ngawpui pawh a filh țhuau tawh. An sir velah chuan tank chhia, motor chhia, sakawr thi leh mihring ruang a let phung bawk a, khua chu a lum a ni mai lo, a rim a na! Tawrh zawh rual a ni lo ang tih tur khawp a ni.

Mahni thawmhnaw, rit tawk tak an ak țheuh a, silai an ken a ngai bawk. Burma phai khaw luma nipui laia ram ro ni sa hnuaia tui in tur pawh nei lova chutianga thui tak han kal chu film-a chan atan pawh a peihawm loh ang tih tur khawp a ni a, hetia han ngaihtuah mai pawh hian a hah hnawk theih hial ang!


Pic: #John_Chhana

An chau lutuk a, sipai kal dan pangngai pawha kal thei an ni tawh lo; a chang phei chuan kawng sira țhut hnawk te a ngai. Chuti chung chuan chawl lovin hma lam panin an kal țauh țauh tho. 

Ni leh khua chutiang khawpa lumah chuan ni leh khua hre lova awm mai te pawh a theih a ni ang, tlangval chak țha lai an leh tawp chang a awm. Vawi khat pawh sipai pakhat hi a tlu hnawk mai a, chalchang ang maiin, a tal ta tawp tawp mai a.

An hotupa Maj RK Hranga chuan "E, Mizo tlangval kan duai dawn em ni?" a'n ti a, mahse a thahruiin a tlin tawh lo. Chutiang hun, mahni thuam leh silai pawh paih daih mai a chakawm ang tih tur khawpah chuan pakhatin a rawksai a ahsak a, pakhatin a silai a putsak bawk. Chalchang ang maia tal tawp tawp khawpa chau pawh chu duai lovin a kal zel.

A hahthlak bawk a, Jem Thanțhianga pawh a hmai a vung hial. Mahse, "Hei ka platoon-a mi huaisen Thanmawia pawhin LMG nilengin a pu a, vawi te khat mah 'Ka va chau em," a ti lo. Kei pawh ka men theih chhung chu ka kal zel ang," a ti bur mai.

Lushai Scout te hi kal chakah leh kal thui thu-ah fak an hlawh a, chumi țum pawh chuan ni hnih kal kha ni khatah an ban; Magwe pana an kal țum a ni a, 1945 May thla a ni. 40 degree Celcius-a lumah tui in tur tlachham chungin mel 36 teh meuh an kal a, a awihawm loh ngang a ni ang, an hotute pawhin an awih lo! Mahse a awih lotute chu an kal thleng tih hriaa hmutute an ni tlat si. 

Khatia indopui pahnihnaa khawvel sorkar liante an indo mup mup țum khan, chau tak chung pawhin, chhawlhal, tuihal leh sahal chung pawhin Zofate'n hma lam an pan țauh țauh tho tih hi an lo hre țhup asin.


Post a Comment

He post chungchanga i ngaihdan lo sawi ve rawh:

Previous Post Next Post