Engtin nge ni zel dawn?

(Matric pass thar te tan)

- Vanlalthansanga


Kumin 2021-a HSLC result duhawm tak tak neia hlawhtlinna changtu zawng zawngte ka lawmpui che u a, ka chhuang tak zet che u a ni. In thawhrimna rah a taka in han seng thei ta mai hi a hlu ka tihpui em em che u a ni. Chutih rual chuan la hlawhtling ve rihlo te pawh beidawng mai lova a kum lehah a aia tha zawka ti tura an rilru te an inbuatsaih ka duhpui em em a ni.


*Kan lo pass ta a, engtin zel nge?*
Matric chu ilo pass ve ta reng mai. Eng kawng nge i zawh dawn le? Arts nge Science nge Commerce zawk? Result nei tha deuhte chuan Commerce leh Science pawh an la thei ang a. Result neih that avanga Science emaw Commere emaw lak ngawt pawh kha a ni ber lo, i nih tum emaw i tuina emaw kha a pawimawh ta zawk a ni.
*Next step chu Class 12/10+2 pass*
Matric i pass hi chu i bul tanna chauh a ni. Leihlawn a lawn tum angah inngai la, Matric i pass hi chu i leihlawn rahka rah hmasak ber ang chauh kha ala ni. Class 10 pass hnua Board exam i pass ngai leh hmasa ber chu 10+2 hi a nih vang a nih chu. 10+2 pass chu i first target anih angai, i ‘Aim in Life’ kha nih i duh chuan Class 12 hi tha taka i pass leh phawt a ngaia, chumi hnuah chuan i kalna tur chu a chiang chho ruak tawh dawn a ni. I nih tum chu ni turin Class 12 hi a bawhkan theihloh mai ni lovin, tha taka i pass angai zawk a ni tih hi ilo hre hmasa dawnia. Class 12 pass hnua zir nghal mai theih Nurse, Health Worker, Lab. Technician, Computer, Electronic, Engineering leh adang tam tak a awm kan sawi vek seng lo vang. Ka sawi tum tak zawk chu Class 10 pass hnuah chuan Class 12 pass leh hi a pawimawh em em a ni tih zawk hi. 

*Tumna nge pawimawh tuina lam?*
Tuina nge pawimawh tumna tih hi zawhna chhan mai harsa pawh a ni mai thei a, kei chuan i thil tum kha dah pawimawh zawk rawh ka ti che a ni. Entirnan Doctor nih i tum chuan Class XI ah Science i lak ngei ngei angai. Science chu i subject tuina ber ala ni lo maithei, mahse i Doctor nih duhna chu a len zawk phawt chuan Science chu i zir anga ila tui chho em em ang tih ka ring a ni. Chutiang zelin Civil Sercive lam emaw Competitive exam beih i tum a nih chuan Science emaw Commerce emaw lak angai kherlo thei bawka, Arts lamah exam-naa mark scoring zawk subject te pawh a awm zel an ti bawk a ni. Miin subject harsa an tih avanga lo huphurh ve ngawt tur a ni lo, mi fate pawhin an zir a, kan duha tak taka, kan tum tak tak anih chuan kan zir anga, kan thiam anga kan tui chho bawk ang tih hi a ni. 

*Tumna a san chuan tlakna pawh a sang*
Tumna han tihsan ve phawt chu angai a ni ti ru. Mahse kan thiamna leh kan theihna te pawh thlir tel a tha thin a nia. Engpawh chu nise i tum kha han tisang ve phawt la, tichuan chumi tihhlawhtling tur chuan theihtawp chhuahin bei mai rawh le. “Tum mumal neilo chu Lawngleng kartu neilo ang a ni” an tih ang tak tak hi a ni a, tum bulfuk pawh i nei loh chuan lehkha zirchhan i neilo tihna a ni a, tih that pawha har viau ang. Mahse tum mumal take maw ‘dream’ emaw i neih tlat chuan i thatchhe lo vang, theihtawpin i ‘dream’ chu tihhlawhtlin tumin i zir ka ring tlat a ni. 

*Bul tanna sang tak a ngailo ania*
‘Bul tanna sang tak a ngailo’ ka tih awmzia chu hna bul tanna lam a ni ka sawi ni. Entirnan Competitive exam-a inziah tlin tum i nih pawhin a hniam lam atanga inziah tlin hmasak te pawh a theiha, a thatna lai a awm tih lam hi ania ka rawn sawi chhan zawk a chu. I dinhmunin a zirlo a nih chuan sang tak atanga hna bul tan kher kha angailo, constable atanga IPS a inziak tling thei an awm a nih chuan nang pawhin i thei ve ngei ang tih kha inring tawp mai rawh.

1 Comments

He post chungchanga i ngaihdan lo sawi ve rawh:

Post a Comment

He post chungchanga i ngaihdan lo sawi ve rawh:

Previous Post Next Post