'Sparash' Hand sanitizer a him lo?

Aizawl | June 4, 2021: Directorate of Health Services Controlling & Licensing Authority Pu Lalsawma chuan Mizoramah Hand Sanitizer him lo hmuhchhuah leh a nih thu a sawi.

Pu Lalsawma chuan COVID-19 hripui leng laka invenna hmanraw pawimawh tak pakhat HAND SANITIZER chu India ram pumah a lem (spurious/Sub-Standard) a darh nasa hle tih a sawi . Product ţha lo dapchhuah hna hi Mizoram Food & Drug Administration (FDA) chuan a thawh reng thu leh hmuhchhuah pawh engemawzat an neih tawh thu a sawi bawk.

Pu Lalsawma chuan tunhnaiah Guwahati atanga online hmanga mi thenkhatin an chah chhuah, Hand Sanitizer "Sparash" chu Mizoram hmun hrang hrangah a darh nasa hle tih sawiin, a chah chhuaktute kut atangin engemawzat an hmuh chhuah thu a sawi.

Hand Sanitizer "Sparash", Purabi Pharma Lab Narengi, Guwahati-a mite siam hi Mizoramah 500 ml leh 5 litres chi hmuh a nih thu sawiin, Pu Lalsawma chuan danin a phut anga label siam a ni lova. Drugs Rule chuan label dik tawk lo damdawi reng reng  zawrhchhuah a khap tlat a ni, a ti.

Assam State Drug Controller hnenah thil awmzia enfiah tura an ngen thu sawiin, annin rang takin hma an la nghal a. A siamtute pawhin thil dik lo a awm tih pawmin an hralh chhuah tawh zawng zawng koh kir (Product Recall) nghal an remtih thu Pu Lalsawma hian sawiin, ni 7 chhungin Assam State Drug Controller hnenah recall dinhmun an report dawn a ni.

Mizoram hmun hrang hranga he Hand Sanitizer (Sparash - Batch No. 9336, 9337 leh 9338) kawlte chuan an kawl zat bialtu FDA Officer hnenah report turin ngen an ni a. Bialtu FDA officer hriatpuinain thawn let tur a ni ang.

Pu Lalsawma chuan thil siamchhuah (products) reng reng koh let (recall) ngai a nih chuan thil fel tawklo a awm tihna a ni a, chuvangin mahni hman atana kawlte pawhin hman loh a him ber tih hriat tur a ni, a ti.

Hand Sanitizer hrim hrim  chi hrang hrang a tam em em a. Natna hrik danglam tak a nih avangin WHO in Coronavirus laka kut silfai nana a recommend chu 80% Ethyl Alcohol emaw 75% Isopropyl Alcohol emaw a ni a. Hripui leng kara awm kan nih avangin Hand Sanitizer hman tur thlanah mitin kan fimkhura kan duh uluk a ngai takzet a ni.

- DIPR