CSR kaltlanga pek Medical Equipment-in Lunglei lo thleng

Lunglei the 4th June 2021: Lunglei DC Pu Kulothungan A, IAS hmalakna in India ram chhung hmun hrang hrang a NGO foundation/Company/Corporation-te atangin CSR kaltlangin Lunglei District bakah chhim lam mipuite tana hlawkpui leh tangkaipui theih tur Medical lam kaihhnawih bungraw hrang hrang dil a ni a. Heng zingah hian Medical Oxygen For All (MOFA), New Delhi atangin Oxygen Concentrator paruk (6) a thawn man te nen cheng nuai ruk sing nga (₹ 6,50,000/-) man hu dawn a ni a. Hemi bakah hian VISION IAS Academy, New Delhi atangin PPE Kit/Set 1500, N-95 Mask 1500 leh Oximeter 100 (a vaiin a thawn man cheng nuai 20 man hu) dawn bawk a ni. Lunglei DC hmalakna eng atang hian VISION IAS Academy hian Aizawl DC hnenah mipuite tangkaipui theih tur medical equipment hrang hrang an pe bawk a ni.


Heng medical equipments te H&FW Department hnena hlanna chu vawiin chawhma khan Lunglei DC Office ah neih niin DC Pu Kulothungan A chuan Lunglei CMO Dr LC Liana, Medical Superintendent DR SR Ngurchamliana leh SMO Dr Lalrinthangi te hnenah a hlan a. Heng hmanrua leh bungrua te hi Lunglei District chhunga CCC, 4C, CQC leh mamawhna dangah te sem chhuah tur niin Lunglei DC chuan H&FW hotute chu a tangkai thei ang bera hmang tur leh deployment plan pawh mumal taka ruahman turin a chah a ni.
Covid-19 damlote leh anmahni enkawltute hmanraw mamawh tak tak ngaihvena chah chhuak tu Lunglei DC chungah H&FW Department hotute chuan lawmthu an sawi a ni.
Covid-19 hrileng avanga Mizoram in hun khirh leh harsa tak kan tawn mek karah mipuite tana hman tangkai theih tur medical bungraw hrang hrang phal taka pe tu Pu Jatin Gupta, Founding Member, Medical Oxygen for All (MOFA), New Delhi leh Pu Ajay Kumar Singh, Founder and Director, Vision IAS Academy, New Delhi te bakah bungraw lakkhawm leh Mizoram–a thawnchhuah chungchangah a buaipuitu Pu Priyank Kishore, IAS leh Pu Vishal Shah, IAS te chungah Lunglei Bawrhsap Pu Kulothungan A chuan Lunglei District mipuite aiawhin thinlung takin lawmthu a sawi a ni.

- DIPR

Post a Comment

0 Comments