Aizawl | June 23, 2021: Tokyo Olympics ‘20 July 23 - 8 August 2021 chhunga neih turah Lalremsiami Kolosib nula chu Indian Women Hockey Squad ah thlan a ni a, hei hi officiala puanchhuah a ni tawh a ni.
Mizoram Sorkar chuan Sports & Youth Services Department kaltlangin Lalremsiami hi Rs 25,00,000(Cheng Nuai sawmhnih panga) a pe dawn a ni.
He thu hi vawiin International Olympics Day hian Sports Minister Pu Robert Romawia Royte chuan a puang a. He Lawmpuina 1st Instalment Rs 10,00,000/-(Cheng nuai sawm) chu naktuk ni 24,June 2021 hian Lalremsiami hlawhtlinna puala Thingpui Inhona CM Conference Hall-a neihah Pu Zoramthanga Chief Minister in Remsiami Nu hnenah a hlan ang a. A bak Rs 15,00,000/-(Cheng nuai sawm panga) chu Olympics zawh hnuah amah Lalremsiami kutah hlan a ni ang.
Olympics Medal a la a nih chuan Sorkarin hamthatna dang pawh State dangte tihdan enin a siam belhsak dawn a ni tih Sports Minister chuan a sawi bawk.
India Camp Bangalore a awm mek Lalremsiami chuan Mizoram Sorkar chungah a lawmthu telephone in a rawn sawi a, Mizoram Chief Minister Pu Zoramthanga chungah lawmthu sawiin Sports Minister Pu Robert Romawia Royte leh an Bialtu MLA & Minister Pu K.Lalrinliana te, Sports Department hotute, amah lo enkawl thintu Coach te leh Hockey Mizoram te amah lo tana lo thlawp thintu Zoram mipuite chungah lawmthu a sawi bawk a, theihtawp a chhuah tur thu a sawi bawk.
Mizoram Sorkar chuan Lalremsiamin Youth Olympics a Silver Medal leh Asian Games a Silver Medal alak khan Rs 20,00,000(Cheng nuai sawmhnih) chu amah chawimawi nan leh tihphur nan alo pe tawh a, tunhnaiah a training tanpui nan Mizoram State Sports Council(MSSC) chuan Rs 50,000(cheng Singnga) alo ruahman sak tawh bawk a ni.
- DIPR
Post a Comment
He post chungchanga i ngaihdan lo sawi ve rawh: