Govt Aizawl College Miss 2021 & Hlukhla Miss 2019 - Sawmtei Hmar

Govt Aizawl College (GAC) Miss 2021 leh Hlukhla Miss 2019 H Lalmalsawmi kan belchiang.


Sawmtei Hmar tia hriarhlawh H Lalmalsawmi hi H Lalmuankima leh TC Lalawmpuii te fanu pahnih zinga a upa zawk niin, Decmber 4 ah a piang a.  Lawngtlaia a cheng leh khawsa niin, Kohhran lamah chuan Lairam Isua Krista Baptist Kohhran(LIKBK) ah an lawi a ni.


Sawmtei Hmar -in EXPLOREMIZORAM.COM Zawhna a chhanna te lo chhiar rawh le..



Zirna lam:
Pawl 10 hi Don Bosco School Lawngtlai ah ka pass chhuaka, Pawl 12 hi South Heath Academy Lawngtlai ah tho ka pass chhuak a. Tunah hian Govt Aizawl College-ah B.Com 2nd semester ka zir mek.

Hobby: Dancing(lamthiam vaklo mah ila, nuam ka ti😁)


I duhzawng leh ngainat zawng hrang hrangte?
• Lehkhabu duh: The 3 Mistakes of my Life- Chetan Bhagat
Actor/Actress Kangana Ranaut
Zaithiam: Celine dion
Chawhmeh: Engpawh ka ei thei vek a, duh loh èm èm ka nei hran lo.
Hla : A mak mang e, Vân lalber chuan(KHB-506)
Hmun: Zawl leh theng thaw nuam tak, thing ten a hual velna hmun.
Rawng: Green/black
Ziaktu: Chetan Bhagat

Mize ngainat zawng:
- Mi dik, thu a tihtluk tawh sut let tawh ngai lo, mi rinawm.


Mize ngainat loh zawng:
- Dawheh, mahni thiam channa turah chuan eng pawh ti hrehlo ho.


Kawppui tura duhzawng?
- Eng mi pawh nise Pathian tih mi, pathian ah cauh innghat thin leh ruih theih thil ti lo.

Relationship status-  ________________________

Aim in life-  to become a bank manager.


GAC Miss  2021 thlanna a tel chhan?
- Kan SU te leh House Leader ten beiseina sang tak neiin kan hming an lo pe lut a, an beiseina tih hlawhtlin ngei ka tum avangin lawm takin ka tel a ni.

GAC Miss  2021 nih hi i inring reng em?
- Ay, kan contestant pui te ka en khan ka inring pha lo hrim hrim😁


GAC Miss  in I nuna nghawng a neih??
- Mahni inrintawkna neih leh engkima pathian a inghah a pawimawh zia ka in zir chhuak.


Modelling lam hi i tui reng em?
- Aw, tui ve tho mai.



Hlukhla Kut 2019 pualin Hlukhla Miss 2019 atana thlan i ni a, kha ta i tel dan kha:
- keimah chuan tel tumna ka nei hran lova, amahse, kan veng YLA hruaitute'n duhsakin tel turin min sawm a, Ka chhungte nen inrawnin YLA hruaitute sawmna zahawm tak avanga tel ka ni.


Hlukhla Miss 2019-in i nuna nghawng a neih:
- Ka nuna nghawng a neih len ber chu mahni inrintawkna min pein mahni inrintawkna neih a pawimawh zia leh selna tam tak karah support-tu tha Nu leh pa, chhungkua leh thiante an pawimawh zia ka hriat phah.


Hlukhla Miss thlan dan tlangpui:
- Lawngtlai Veng tin atangin pahnih theuh kan chhuak a. Tichuan personal interview te min neihpui hnuah, Hlukhla kut ni khatna-ah Lai dress nen cat walk kan nei a. Chuta tang chuan top 10 an thlang a. Hlukhla Kut ni hnihna-ah top 10 te kha  dress chi hnih (2) inbuatsaihin, Modern cultural dress leh Lai thuam kimin ramp walk kan nei leh a. Chuta tang chuan Top 5 an thlang leh a. Top 5 te chu Q&A round kan hmachhawn a. Kan chhanna mai piah lamah kan facial expression, catwalk leh kan dress atang ten mark an pe a ni.


Zawhna dang:::
1. A tel lova i awm theih loh:
-  Pathian kaihhruaina, chhungkua leh thian te.

2. I nun kaihruaitu:
- Ka nu leh pa, kawng engkimah ka hma min hruaisak a, a tawp thleng a min beihpui thintu an ni a. Ka nun a kawng dik ka zawh theih nan rim takin min enkawl a, min zilh a min kaihruaitu tha tak an ni.



3. Hringnuna i hlauh ber:
-  Ka hmangaihte chatuan a inhmu thei tawhlo tura inkalsan.

4. I tih ngai miah loh tur:
- Mi dang hmuhsitna leh hnuaichhiah.


5. Mizo Tualzal nuna ṭha i tih: Mizo tlawmngaihna


6.  Quote i duh ber:
Take chances, make mistakes. That's how you grow. Pain nourishes your courage. You have to fail in order to practice being brave.
- MARY TYLER MOORE


7. Mizoram leh Mizo tualzal nuna Mizo hmeichhiate dinhmun:
- Mizo hmeichhiate hi kan changkangin kawng engkimah hma kan sawn tawh hle a, Sorkar pawhin min humhalh hneh em em a, ram ti hmasawnna atan tangkaina nasa tak kan nei  tawh bawk a. Sorkar hnaah emaw, zirnaah emaw, sum lakluhna lamah te thlengin mipate tih theih ang tamtak kan ti thei ve tawh a. Chu tih rual chuan kohhran ah te, khawtlangah te,zirnaah te leh chhungkaw enkawlnaah hmasawnna tur rahbi pawimawh tamtak kan la hma chawp teuh a ni.



8. Hnam hmingṭhat leh hmingchhiat kawngah Hmeichhiate'n mawhphurhna:
- Hnam hmingthat leh hmingchhiat kawnga hmeichhiate hian mawhphurhna kan nei sang hle a. Thil hoteah hmingchhe awl lutuk mai kan ni a. Kan nundanah te fimkhur kan ngai hle a. Thangthar lo la awm zel turte tana entawn tlak tak kan nih zel theihna turin Social media lama kan in tarlan duh dan te leh lâr kan khelh dante hi in enfiah a tul takzet a ni.


9. Hnam ziarang chawinun kawnga Hmeichhiate mawhphurna:
- Hnam ziarang chawinung turin hmeichhiate hian mawhphurhna kan neihsan zia i hre thar leh ang u. Tlawmngaihna leh midangte tana inpek duhna kawngah te hian midangte zirtir tu nih tum ta ila. Mipate hian hmeichhiate ngaihsan nih tluka thlakhlelh hi an nei tam lo hle a. Chuvang chuan Zonun Zemawi chawi nung thar leh turin hmeichhiate hian zonun zemawi hi kan ngaihsan thar leh a ngai a ni.


10. Mizote tan 'Fa neih tlem' inzirtir hi a ṭulin i hria em? 
Mizote hi kan la tlem em a, kan economic dinhmun in a zir a nih phawt chuan fa neih tlem aiin fa neih tam kan in zirtir hial zawk tur ani. Kan ram,kan hnam leh kan ziarangte a pil bo mai loh nan leh tun aia nasa a chawi nun zela a awm theih nan.
 
11. Mizo hnam ṭhanmawh bawk nia i hriat?
- Mizo hnam thanmawh bawk ni a ka hriat chu kan tum hniam lutuk hi a ni. Kan hmathlir a tawi a, tumruhna kan neilo em em a,taimakna kan tlachham bawk. Tin, teirei peihna kan neilo hlr. Hlawhchham kan hlauhna hian kan thanlenna kawngah min ti chaklo hle bawk a ni.


12. Mizo hnam damna atana  kawng awm nia i hriatte?
- Mizo hnam damna tur chu a hmasa berah chuan pathian a ni. Taimakna nen hmathlir thui tak nei ila, vawihnih khat hlawhchham a beidawng mai lovin eng kawng pawh zawk ila beih hram hram tum thin ila, Rinawmna leh taimakna leh teirei peihna nen huaisen leh chhel takin bei sauh sauh ila, mimal tina hlawhtlinna a awm zel chian kan hnam a dam leh ang.

13. Hnam chhan nana Hmeichhiate ṭangkaina leh mawhphurna?
- Sawitur tamtak zingah Mizo hmeichhiate hian kan hnampui ngei kawppui atan nei zel ila chu chu hnam chhan nana pawimawh pakhat ani a. A dawt lehah chuan kan ngaihsan zawng leh kan ngaihhlut zawng kan thlak a pawimawh hle bawk. Ngaihsan tur dik ngaisang a, ngaihhlut tur dik ngaihlut hi kan hnam kan chhan leh theihna tur chu a ni bawk a ni.


14. Zirna, Khawtlang leh Kohhran hi?
- Zirna, khawtlang leh kohhran hi thil kal kawp tlat a ni a. Kan ram tan mai niloin mimal tinte kan thanlen nan zirna hi uar leh zual ila, khawtlang tan kan phak tawkin contribution nei thin bawk ila, kawng engkimah kohhran kan belh phawt chuan kan ran hmasawnna atan rahbi pawimawh tak  a ni dawn a ni.

15. Khawtlang, Kohhran leh nangmah:
- Khawtlang leh kohhranah ka theih ang tawkin kan in hmang ve chuan ka hria a. Amaherawh chu, zirlai kan nih chuan kan zirnaah kan lo insawrbing ve a ngai tel bawk a. Hruaitute beisei kan lo phak lohna te pawh tam tak a awm n ka ring. Active members te hi ka ngaisangin entawn tlak tak an ni ka ti a. Chutih rual chuan lâr khelhna leh mi fak nih duh avang a inhmang uchuak te erawh ka ngaisang chuang lo.


16. Social Media leh Nangmah:
- Social media ah hian rilru zawng zawng pe a hmang duh lo mi ka ni. Thiantha leh chhungte biak pawhnan leh chanchin thar hriatna atan leh pathian thu tha lo châwkluhna atana ka hman chuan ka duh tawk viau thin bawk a. Chutih rualin rual pawllo leh lutuk a mawl mang nih erawh ka duh lova ka in update ve reng thin bawk a. Mahni nunah hlim loh chan tamtak alo awmin intih hlimnan ka hmang thin bawk. Mi tih ang apiang chu tih vel zel duh mi ka ni a. A chhia leh a tha thliar hrang thiam rual kan nih tawh avangin kan duh thlanna a pawimawh takzet bawk a ni.

17. Mizoram ṭhalai tam tak tlakchham:
- Mizoram thalai tamtakin kan tlakchham chy Hlawhtlin tumna kawnga tumruhna neih hi a ni. Hlawhtlin tum aiin mi nawlpui kal rual a kal ve pet pet bak thlakhlelh kan nei lo a. Mahni hnam ngaihsan aia hnam dang ngaisang kan tam em em bawk a. Chu chu engvang nge kan tih chuan hlawhtlin tumna kan neih loh vang bawk a ni. Hnam dang hlawhtlinna cauh kan hmu a, kan ngaisang a. An hlawhtlinna phen a an tumruhna te leh an beih nasat zia erawh kan hmu lo. Hlawhtlin tum taka kan beih ve theih hunah chuan kan hnam ngaihsan na chang tun aia nasa in kan hre leh zual ang.


18. Mizo ṭhalaite hian ngaihsan tur dik an ngaisangin i hria em?
- Keima thlirna ah chuan ngaihsan tur dik ngaisang tawk chu an awm a, a nawlpui erawh chuan kan ni lo. Thlirna mit a in anglo ang hian kan mi ngaihsan zawngte kan tehna pawh a in ang lo a ni.


19. Ngaihsan tur dik nia i hriat:
- Eng mi pawh nise, a hnathawhna a rinawm, taima leh mi tumruh, a hnathoh/zirlai a theihtawp chhuah mite leh rilru nghet nei mi te hi ngaihsan tur diktak niin ka hria.


20. Hlawhtlinna tura pawimawh:
- Hlawhtling tur chuan taimak a ngai a, rinawmna nen tumruhna nen beih angai a. Vawihnih khat hlawhchham a beidawng ta mi hlawhtling an awm ngailo. Hnathawh thlak zung zung leh teirei peihlo an hlawhchham cháwk thin bawk. Midang tih ve apianv ti lovin Vision mumal tak neiin hna thawh dan tur Plan mumal tak nei a kan beih a ngai takzet a, midang lo hlawhchham tawhna ah pawh hlawhtling tur a tumruhna leh beidawnna nei ve lo nih angai bawk a ni.

21. hloh i hlauh ber:
- Kawng engkim a ke ka penna kawng a malsawmna te, tumruhna te, taimakna te leh hlawhtlinna te min pe tu Pathian leh a hlawhtlin theihna tura a chhia a tha thlu lova min support tlattu ka chhungkua te hloh ka hlau ber.


22. Zo hnam inpumkhatna hi a thlen theih i ring em?
- Ring teh meuh mai. A chung lama ka sawi tawh ang khian zo hnam inpumkhatna nei tur chuan kan hnam ah kan chian a ngai a. Mahni hnam ngaihsan na chang hria a, theih tawp chhuah a kan beih phawt chuan hma khawsang a kan piputen a thlum a al eiza a an lo awm ho tawhna te kha chhawm nung zelin Zohnam inpumkhatna hi a thleng ngei ang.


23. Hnam dang nupui pasal neih hi:
Hnam dang nupui/pasal neih hi kan hnam tih zahawm lohna leh chimralna pakhat leh langsar tak anih avangin tha ka ti lo a ni.


EXPLOREMIZORAM.COM i hmuh dan:
Mizo thalai mai ni lovin Mizoram pumpui hmasawnna kawngah kawh hmuh theitu tha tak leh hmangchang hre tak an ni in ka hria. Tin, in thil tihte hi tha ka ti a, kan ram chhunga thil thlengte awlsam taka kan hriat theihna a ni a. Ram hmasawnna kawngah pawh tangkai tak a niin ka hria. Chhunzawm zel nise in kal leh zelna turah pawh duhsakna sang ber ka hlan nghal bawk a che u😇GoGo EXPLORE MIZORAM



Founder/Editor
Explore Mizoram


(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]




(Website leh a hnuaia fakna hi lo hmet ve rawh.)

Scan to Donate for this website

Post a Comment

0 Comments