LUNGPUI KHA LUNGTE IN A KAMKI!


Lo a ni sen sa hnuai a ni tin khel lova
Zu-va chuh puina kara dam mawh hritlan sawi lova,
Rim taka hna thawk thin kan nih avangin kan intuai hnûm ve hman lova.
Chhun ni sen sain kan vun a em uk zova,
Nangni khawpui mite angin kan mawi ve pha lo!



Hna hrâm tinreng kan hma a chhuak ang ang thawk bawrh bawrh thin kan nih avangin kan kut te a no ve lova.
Thlan tuiin min bual huh hnep thin avangin kan rim lah a tui ve zo lo.
Mahse, hlim takin kan nui ve bâwk bâwk thin.

Engmah lungkham nei lo mi lian fate angin kan tituai a no nalh ve lo va,
Tuipui ral tawng pawh kan thiam ve hek lo.
Mahse, hmangaihna thinlung kan nei.
Kan thian in ni ve duh ang em?

Khawvel ropuina leh finna kan hre tam lo na a,
Ramhnuaiah erawh in hma kan hruai thei thung ang.
Kan ip ah pawisa dap fuh tur nei tam lo mah ila,
Kan neih chhun- hmangaihna leh kan theihna sang ber kan thlai thar te phut let nei lo in, in tan kan lo hlan thin e.

Hlim leh dam takin in hmangaih chhungkua te nen in lo puar pui kan duh em em a ni.
Kan hma hruai ula, kan hriat loh ah min hmusit mai lo in min hrilh ula,
Hmasawn a in buai em em lai hian min han theihnghilh bik suh u aw.

Kan thlah tute thu hlu vawn kha kan la nun pui reng e-
"Dam leh tlang khatah, thih leh ruam khatah" kan tih kha maw! 💪😊❤️


(Rim taka in thawh rah, in thlai thar te nikum Lockdown tirh atanga veng leh khaw hrang hrang a a thlawn a pe thin tu te in hnen a lawmthu sawi nan he thu hi ka ziak a ni. Kan lawm e. Kan lawm e. Lalpa'n malsawm zel che u rawh se. In zarah kan puar in kan hlim. Kan ngaisangin kan chhuang che u. Zahna chibai kan buk a che u. Lungpui lum tur kha Lungte in a kamki!🥰❤️🙏 Thlalak hi Mizo Special Report group a mi ka hmang mai. A la tu ka hrelo. - Rosy K.)





Scan to Donate for this website

 

Post a Comment

0 Comments