“SAWKARIN HRIPUI LENG KARAH CHHUANCHHAM KAN AWM LOHNA TURIN THEIHTAWP A CHHUAH ZEL DAWN : NI 100 INHLAWHNA TUR SUM HMUH BELH A NI” – RD MINISTER LALRUATKIMA

Aizawl | June 16, 2021: Rural Development Minister Pu Lalruatkima chuan COVID-19 hripui leng vanga harsatna, a bik takin thingtlang lam mi ten harsatna an tawhte chhawk zangkhai a nih theih nan Rural Development Department-in theihtawpin an chhuah reng tih sawiin, sawrkar laipui pawh theihtawpin an dawr a, kum 2021-22 chhunga MGNREGS hnuaia inhlawhna turin Ministry of Rural Development chuan April, 2021 khan Rs. 7788.34 lakh lai a rawn sanction bakah khan niminpiah lawk, June ni 14, 2021 khan Rs 14502.84 lakh lai chu mipui inhlawh nan an rawn sanction leh tih a sawi. 

Lalruatkima | mizoramassembly.in

Heti hian kum 2021-22 chhung hian mipui inhlawhna atan Rs 22291.18 lakh an rawn sanction tawh tih sawiin Lockdown leh COVID-19 hripui avanga mipui harsat vang lai taka mipui inhlawhna tur sum kan hmu hi a lawmawm takzet a ni, ati.

 

  Minister chuan kumin atang hian Job Card Holder pakhatin nikhatah Rs 233/-  zel an hlawh tawh dawn a, kum kalta 2020-21 chhunga inhlawhna Rs 225/- aiin Rs 8 in a tam zawk nghe nghe a ni, a ti a. Tun dinhmunah Mizoram pumpui ah Active Job Card Holder mi 205607 an awm mek thu sawiin, kan pawisa hmuh tawh hmang hian Mizoram chhunga District hrang hrangte kumin April, May, June, July leh August thla ah ni 47 in an inhlawh hman a beisei thu a sawi.

 

Minister chuan hetiang a nih chuan kum 2021-22 chhung hian NI ZA INHLAWHNA a nih ang ngeiin NI ZA kan inhlawh theih ngei beisei a beiseiawm a ni, a ti..

 

Pu Ruatkima chuan MGNREGS hnuaiah hian tuihna tipung tam thei tura kum 2019 atanga “Jal Shakti Abhiyan - Catch the Rain Campaign” kalpui tawh pawh kum 2021 ah hian nasa leh zual a kalpui a ni a ti a. Hemi Campaign hnuaiah hian tuihna tipung thei tur leh ruahtui tla luan ral tir mai lova lo dawng khawl thei tur Tuizem, Farm Pond leh Dug-Out Pond te siam tum a ni, a ti a. Bawlhhlawh sawngbawlna turin Compost Pit leh Soak Pit te chu Job Card Holder chhungkuate siam tir tum a ni tih a sawi  bawk. Minister chuan hemi piah lamah hian ei leh bar a hma kan sawn nan leh kan thlai thar te a lo pun zelna turin hmun hrang hrangah a theih ang angin hmalak mek a nih tih a sawi a, ni 100 inhlawhna hmang hian  khaw hrang hrangah rotling leh tangkai thil chi hrang hrang siama hma lak zel a nih tur thu a sawi bawk a ni.

 

Minister chuan India Independence kum 75-na lo thleng tur puala hmalakna “Aazadi ka Amrit Mahotsav” hnuaiah tunah hian heng hmalakna hrang hrang – tuihna humhalh te, van ruahtui tla lo dawhkhawl te leh awareness campaignah theihtawp chhuahin a hlawhtlin nan hmalak a ni a. Heng hmalakna hrang hrangte hi RD department social media handles - Twitter (@RD_Mizoram), Instagram (RD Mizoram) leh Facebook page (Mgnregs Mizoram) ah te phochhuah thin a nih thu a sawi bawk a ni.

 

Minister chuan a vawikhatna atan Phuldungsei khua, Zampui zofate chu Mizoram Sawrkar hnuaiah ngei June ni 14, 2021 atang khan ni 100 inhlawhna hnuaiah an inhlawh ve ta tih sawiin, Mizoram sawrkar chu zofate tan a ding tlat dawn tih a sawi bawk. Minister chuan Rural Development Department mai bakah Sawrkar hnuaia department hrang hrang pawhin mahni theihna zawn theuhah chhuanchham kan awm lohna turin hma lak a ni a, Gas, Buhfai leh thil dangah pawh kan dinhmun a tha rih hle a ni a ti a. Hetiang ang dinhmun kan thlen theihna tura Pathian malsawmna kan dawng hi a lawmawm takzet a, hemi chang thei tura Chief Minister Pu Zoramthanga hmalakna a fakawm takzet tih a tarlang bawk a ni.

- DIPR