Health minister-in COVID-19 hri kai in lama inenkawl nana hman tur ‘Nishtha Teletrack’ apps tlangzarh

Aizawl | June 16, 2021: COVID-19 hri kai zinga mahni in lama inenkawlte (home isolation) online hmanga vilna tur ‘Nishtha Teletrack’ application chu vawiin khan Health Minister Dr. R. Lalthangliana’n video conferencing kaltlangin a tlangzarh.

‘Nisha Teletrack’ hi mobile leh web-based application niin, thla 3 chhunga hman atan ruahman phawt a ni.

COVID Helpline Doctor duty ten home isolation-a awmte mumal zawka an enkawl theih nan National Health Mission chuan JHPIEGO nen tangkawpin Technology hmanga  in lama damlo hri kai enkawl mekte uluk zawka an vil theih nan ‘Nishtha Teletrack’ hi a duang chhuak a, The United States Agency for International Development (USAID) in hemi atana senso zawng zawng hi an tum a ni.

He Teletrack Application hmang hian COVID damlo te chu COVID helpline atangin call an ni thin ang a, damlo mamawh dan azirin online-Teleconsultation hmanga doctor duty te rawn theih an ni dawn a ni.

Doctor rawn mai bakah hian Dietician-in ni bik ruatah ei leh in lam chungchang counselling a pe ang a, rilru lam counselling pawh a ni ruat bikah Clinical Psychologist ten an pe thin dawn bawk a ni

Damlo smartphone hmangte chuan he Teletrack Application hi download in nitin an dinhmun - khawsik zat, SpO2 leh a tul dangte an upload thei ang a, chu chu COVID help-line atangin Teletrack dashboard atangin a vil theih dawn a ni.

Emergency thilah pawh damdawi in lama in refer ngaite a hriat zung zung theih dawn a, State-in data monitoring system tha tak kan neih theih phah mai bakah damlo te tan a tangkai hle tura beisei a ni.

Nishtha Teletrack tlangzarhtu Health Minister Dr. R. Lalthangliana chuan Mizoram leh India ram pumah COVID-19 second wave nasa taka buaipui a lo ngaih tak avangin damdawi in bakah Covid Care Center leh 4C-ah te inenkawl a ni a, heng inenkawlna hmun bakah hian mahni in lamah mi thahnem tak an inenkawl mek bawk a, sawrkar laipui phei chuan inkaihhruaina an tihchhuah thar berah COVID-19 hri kai zinga symptom nei lote leh symptom na vak lo (mild symptoms) neite chu in lamah inenkawl tur a rawn ti tawh nghe nghe a, inenkawlna hmun tura ruat bikahte hi chuan a hlawma awm an nihna laiah daktawr leh nurse te tan vil a harsa lova, in lama inenkawl (home isolation) te hi inkalchilha in vil a hautakin a buaithlak em em mai a, Nisha Teletrack a awm takah hi chuan thil tih a awlsam tawh dawn a ni, a ti a. COVID-19 hri kai, in lama inenkawlten he application hi chhawr tangkai ngei se tiin duhsakna a hlan a ni.

Health Minister hian nikum January thla a USA a zin tumin khawvel huap pawha research  University hmingthang John Hopkins Programme for International Education in Gyneacology and Obstetrics (John Hopkins University Affiliate (Jhpiego) hotu Dr Leslie Mancuso leh USAIDS-a an hotute chu Mizoram sawrkar  nena thawhdunna kawngah a lo zuk dawr tawh thu sawiin, tuna hmalakna pawh hi he thawhhonna kal zel rahchhuah a ni, a ti a. Dr Bulbul Sood, Jhpiego Country Director for India leh NISHTHA Teletrack siamna atana senso tumtu leh theihtawp chhuaha hma laksaktu USAID hotute, a bik takin Deputy Director of Health at USAID/India, Dr Amit Shah leh Dr Anuradha Jain, Advisor Health Systems Strengthening, USAID/India  te chungah lawmthu a sawi a ni.

- DIPR