S Lungpher leh Rawlbuk inkar-ah truck chesual

Aizawl | June 16, 2021: Truck Cement phur Motor chu Nizan Dar 11:00Pm khan, S Lungpher leh Rawlbuk inkar S. Lungpher atanga KM10 vela hla-ah chesualin Vanneihthlak takin thi an awm lo.



Truck chesual-ah hian Driver Pu Lalrammuana(Mama) Kolasib erawh pawn lamah hliam lian tham awm lovin a Kawng leh khel bawr na deuh niin a insawi a, Handyman Lalruatdika Bungtlang West erawh hliam nei lovin pilh leh pem tlem neiin a sil deuh chauh a ni.

Lirthei hi Pu Tlanmawia Kolasib 'Khiangte Construction' neitu ta niin thu dawn a ni.


Truck hi kawngpui atang hian metres 300 vela hlaah lumin kawngpui atangin hmuh theih a ni lo. Driver hi motor awmna thlenga lumin Handyman erawh motor hian hlawk chhuakin anmahniin an lo vak chhuak a ni. S. Lungpher YLA leh VC ten Accident a awm tih an hriat ve leh Motor Chetsualna hmun hi tukin Dar 7:00Am vel khan mipui punin an pan nghal a, hliam tuarte hi S. Lungpher PHC hmuna thawktu medical team ten First Aid pein Siaha lamah phurh nghal an ni.


Truck hi a lu lam a chhe hneh hle a, a body dang erawh a him thawkhat viau. Motor hnuh chhuah dan tur erawh Motor neitute leh Khawtlang hruaituten an la sawiho tura beisei a ni a, Cement erawh ruah a tlak deuh reng avangin khawtlang hruaitute ruahmannain a remchan ang anga lak chhuak mek a ni. Cement thiar vel mek lai hian Khaw chhungah Chhiat tawk(Mithi) an neih avangin S. Lungpher thalaite hi haw in, Cement thiar bak hi Rawlbuk YLA ten an thiar chhunzawm ve leh nghal a ni. Rawlbuk YLA te hi mi 30 bawr an rawn thawk chhuak ve bawk. A lan danin motor hian kawng thlang lei nemna lai a dai sual ni in a lang.

Post a Comment

0 Comments