Ticker

10/recent/ticker-posts

Euro 2020 First Match Thlirlêtna

- K Remruatfela


Euro 2020 team tinte first match chu kan lo en zo leh ta a. A result leh inhnehna lam chu eng pawh ni se Euro thlirna hmasaa ka rawn rin lâwk ang deuhin team quality-ah ram lian leh ram te a inthlau khawp mai a. Hei tak hi football ropuina ka ti lo thei lo!


Big 8 kan tarlan zingah rin phâk bâkin Italy leh Germany game a hmuhnawm a. Tlar hnung tha ber tura ngaih Netherland erawh an hnungdawl rinrawl ver Virgil van dijk awm loh a lang hle! Spain leh Portugal game a mawi em em bawk! Champ tura mi tam tak rin France counter attack a hlauhawm tak zet a, ram tenau zâwk an tum hunah phei chuan an tawrhhlehawm hle ang. Mizote tan rawn England game hi players quality ngaihtuahin beisei a phâk lo thin hle a. An keeper hlui, David James sawi ang deuhin minute 90 chhungin game quality a inthlak zung zung a, teirei peihna an tlachham a ni ber. World No.1 Belgium game mawlh kha a ropui. An players innghahna Kevin De Bruyne awm lo tih hriat loh lêkin an rawn che tha a, game an control dân a in balance em em bawk a, ropuina ram an pan mek a ni a tih loh theih loh!

Ram lian vak lovah chuan rin ai takin Austria game kha a mawi ka ti a. Quality sâng tak ti-a han sawi tur chu ni lo mah se,  an game kha hmuhnawm ka tih zâwng tak a ni. Denmark team pawh kha an thiampuipa vanduaina tawh hma kha chuan an game a mawi hman hle a, boruak dang an han tawng khan a hnuaa an game a nghawng tih a lang chiang reng a, a pawi em em a ni. A pangngaiin khel tluan se la chuan an game atang khan big 8+ a dah chhoh theih hial tur an niin ka hria. Ram tê zingah beiseina sâng tak kan neih rûk ve tho Poland erawh beisei an pha ta chiah lo a nih kha!

A mimal players ah chuan Kimmich (Germany); Wijnaldum (Netherlands); Alexander Isak (Sweden); Pogba (France); Barella (Italy); Mount (England); Pepe (Portugal); Dumfries (Netherlands); Mertens (Belgium) te an khel tha hrih hle a. Star of the match-a an thlan ho pawm loh ka nei nual thung! Players lâr saah chuan Christiano Ronaldo (Portugal); Lewandowski (Poland); Mbappe (France); Harry Kane (England); Kai Havertz (Germnany); Kante (France); Hamsik (Sweden) ten ka beisei angin an khel tha lova, ka lo beisei sâng lutuk hlawm pawh a ni maithei. A game mal zawnga thlir chuan France v. Germany game leh Austria v. North Macedonia game kha hmuhnawm ka la ti ber a.  Netherlands v. Ukraine game pawh kha a pui ka ti viau bawk. Chutihlai erawh chuan England v. Croatia game erawh class hniam ka la ti ber thung! 

A chunga thlirletna tâwitê ka rawn siam ho khi in ngaihdan ni lo a awm nual maithei a. Mahse, ngun taka ka chîkna atanga ka hmuh dan a ni miau a, in pawm loh záwng a nih pawhin mimal thlirna liau liau a ni tih min hriatsak dawn nia. Inkhel ka en reng reng hian thlir dan dang daih ka nei thin a. A goal lai vel ai chuan defensive midfield ho an in pass kual lai te, left/right back ten ball an vawrh phei laia players tin positioning te hi ka chik thin leh hmuhnawm ka tih lai ber te an ni tlat thung a. Chûng an game tin chu a tûk chhunah youtube atangin replay enin ka zir chiang leh vek thin a. Chutiang chu mumal taka major tournament ka en tan, kum 10 pawh la tlin hma, Euro 2000 atanga ka chin dan thin a ni a. A taka luhchilh ve si lovah chuan MLA/MP/Local body election leh World Cup/Euro/Copa etc te hi a tuichilh mite tan chuan festival hlimawm tak hi a ni ve hrim hrim. Pathian zara dam chuan 2nd match zawhah review kan la rawn nei leh zel dawn nia.
Post i hmuh dan

Post a Comment

0 Comments