Pachhunga University College (PUC) Miss 2021 Remsiami Tlangte

Pachhunga University College (PUC) Miss 2021 Remsiami Tlangte kan belchiang.

Remsiami Tlangte tia koh leh hriat thin T Vanlalremsiami  hi C Lalherliani leh T Lalrinpuia te fanu niin, May 12, 1999 khan a lo piang a. Aizawl Khatla-ah chengin, Presbyterian Kohhran a lawi an ni.

Remsiami  te hi unau hmeichhhia vek pathum niin, ani hi a tlum ber a ni.


EXPLOREMIZORAM.COM zawhna a chhan te i lo chhiar dawn nia.
Zirna Lam:
 kum 2016 khan Govt. Mizo High School atangin pawl 10 ka pass a.  Pawl 12 hi 2018 khan Home Missions School atangin ka pass ve leh a.
Tunah hian Pachhunga University College ah B.A (Sociology) 6th semester ka zir mek a ni.


Hobby:  Hun awl ka neih chuan movie en nuam ka ti ber a. Chumi anih loh chuan embroidery lam thil hi ka ngaina em em a, la phiar leh thil dang a kaihhnawih siam neuh neuh nuam ka ti thin.


I duh zawng leh ngainat zawng hrang hrangte?
 Lehkhabu Duh: Think Like a Monk, Jay Shetty
• Actor/actress: Theo James, Donnie Yen, Angelina Jolie leh Millie Bobby Brown.
• Zaithiam: BTS, Post Malone
• Chawhmeh:  Bawngsa, Carrot leh Artui.
• Hla: Kristian Hla bu no. 133, BTS - Telepathy.
• Hmun: Ka chhungte emaw ka thiante nena hlim taka kan awm tlan theihna hmun.
• Rawng: Blue
• Ziaktu: Jay Shetty

• Mize Ngainat Zawng:
- Mi rintlak, tupawh kawm thei leh mi sawisel ching lo- mi laka a tha lai ber hmu thei zel mi.

• Mize Ngainat loh Zawng:
- Dawt sawi ching, mahni thatna tur chiah ngaihtuah, engkima thu ber tum leh midang rilru tur ngaihtuah lem loa che thin mi.

• Kawppui tura duhzawng:
- Pathian tih mi, min hrethiam-tu leh engkima min support tlat tu, eng harsatna kar pawha min hmangaih reng tu tur.

Relationship Status: Single

Aim in Life: Teacher

PUC Miss 2021 thlanna a tel chhan:
- Keimah tak hi chuan tel ka tum ngai lem lova, contest neih hma khan kan department aiawha tel tura thlan chhuah ka ni ta sia, chuvangin theihtawp chhuahin tel turin ka inbuatsaih.

PUC Miss 2021 nih hi i inring reng em:
- Hetiang lamah hian ka vawikhat telna nih avangin ka ngaihtuah pha lo hrim hrim a, ka in ring lo.

PUC Miss in i nuna nghawng a neih:
- Engkimah theihtawp chhuah-a beih hram hram a hlut zia ka zir chhuak.

Modelling lam hi i tui reng em:
- Tui em em lo, ka ngaihtuah ngai vak lo.



Zawhna Dang::
1. A tel lova i awm theih loh: Ka chhungte/ ka phone

2. I nun kaihruaitu: Bible/ Kristian hlabu no. 20-na
“Isua hnenah hlauh tur a awm lo
Engkimin a thupek an awih thin.”
tih hi ka nun kaihruaitu hla a ni.

3. Hringnuna i hlauh ber: Hlawhchham

4. I tih ngai miah loh tur: Inthah/tualthah!

5. Mizo Tualzal nuna tha i tih: Tlawmngaihna

6. Quote i duh ber: Stay focus and never give up!


7. Mizoram leh mizo tualzal nuna mizo hmeichhiate dinhmun:
- Tun dinhmunah hi chuan hetiang kawngah hian mizo hmeichhiate hian hma kan sawn tawh viau laiin kan tan leh zual hle a ngaiin ka hria.

8. Hnam hmingthat leh hmingchhiat kawngah hmeichhiate mawhphurhna:
- Kan incheina hian kawngro a su hlein ka hria. Kan incheina hmang  hian miten min hmuh danah kan zuam awm leh zuam awm loh a hril thui hle. Chuvangin mizo hmeichhiate hian kan silh leh fenah kan fimkhur hian kan hnam hmingchhiatna leh hmingthatna a ni thei.


9. Hnam ziarang chawinun kawnga hmeichhiate mawhphurhna:
- Kan mizo pi leh puten min hnutchhiah vawiin thlenga kan chhunzawm puan bih/ thuam thil (traditional dress) hi kan uar a pawimawh hlein ka hria. Ni bikah te leh function pui deuhah te hmeichhia kan nih chuan kan mizo thuam thil neihte hi kan chawi nun zel a pawimawh a ni.


10. Mizote tan “Fa neih tlem” inzirtir hi a tulin i hria em:
- Kan hnam hi kan la tlem a, fa neih tam hi kan la mamawh rihin ka hria.

11. Mizo hnam than mawhbawk nia i hriat: 
- Hnam hmangaih si lova Party ruihchilh nu leh pa kan tam lutuk hian a ni lo zawngin kan rilru a kaihruai nasa a, awlsam taka sum hmuh tumna a hring chhuak a, hruaitu tha(ram hmangaihtu) kan neih theih loh phah.

12. Mizo hnam damna atana kawng awm nia i hriatte:
• Thalaite hian competitive exam lama kan thangharh a hun hle tawh a ni.
• Ruihhlo do kawngah kan inthurual a pawimawh.
• Nu leh paten Pathian rawn chunga fate an kaihhruai a hun tak zet.

13. Hnam chhan nana Hmeichhiate tangkaina leh mawhphurhna:
• Hnam dang pasal neih loh
• Mizo incheina leh thuam thil ngaihhlut thiam
• Mizo culture-a bet chhiatni thatni-a in ngaihhlut thiam


14. Zirna, khawtlang leh Kohhran hi:
- Mizo nunah hian zirna, khawtlang leh kohhran hi thil in zawm tlat a ni a, amaherawhchu tunlai kan thangthar nunah hian zirna bik hi chawi nungin khawtlang leh kohhran hi kan thlahthlam ta deuh em a tih theihin ka hria. Heng thil pathum hi inrem taka a kal khawm chuan mizo nun zia kal zel atan kal kawp tir thiam hi thil pawimawh tak a ni.

15. Khawtlang, kohhran leh nangmah:
- Khawtlang leh kohhran-a mi in hmang tak te hi mizo nun timawitu an ni a. Mawhphurhna kan nei theuh a ni tih hriain kan kal kawp tir thiam a pawimawh hle in a lang. Theihtawpa khawtlang leh kohhran tana inhman hi kan tih tur pawimawh tak a ni.

16. Social Media leh nangmah:
- Social media hi tangkai taka hman a nih chuan zirna lam leh khawvel eng min hmuh tir thei tu a ni. Hetih lai hian a hman dan kan thiam loh chuan thil pawi tak chhiatna thlen thei tu a ni.

17. Mizoram thalai tam tak tlakchham:
- Mizo thalaite hian kan tunlai nunah hian thil tiha tum tak tak na, tumruhna leh hlawhtling tura tih tak takna nun hi kan tlachham a ni. 

18. Mizo thalaite hian ngaihsan tur dik an ngaisangin i hria em:
- Ngaihsan tur dik kan ngaisang chuan ka hria a, amaherawhchu kan ngaihsante hian an hlawhtlinna tura an kawng zawh hi kan chhut ngai lovin ka hria.

19. Ngaihsan tur dik nia i hriat:
- Mahni thil tuma chianga hlawhtlinna neite hi mi ngaihsanawm te an ni.


20. Hlawhtling tura pawimawh:
- Hlawhtling tur chuan taimakna leh tuma chian a pawimawh.

21. Hloh i hlauh ber: Beiseina

22. Zo hnam inpumkhatna hi a thlen theih i ring em:
- A la thlen theih ka ring.

23.Hnam dang nupui pasal neih hi:
- An in hmangaih a, an hlim chuan kan lo sawisel theih a awm lovin ka hria.


- Hetianga Mizote hmasawnna tura hma lo la a, thil bengvar thlak tak tak hmuh theiha an lo chhawp chhuak thin hi a hlawk thlak ka ti a, chhunzawm zel pawh a tha hlein ka hria. Hei aia hma an sawn zel theihna turin duhsakna ka hlan bawk a ni. 


Founder/Editor
Explore Mizoram


(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]




(Website leh a hnuaia fakna hi lo hmet ve rawh.)

Post a Comment

0 Comments